ქართული ოცნების დეპუტატი ლადო კახაძე ფიქრობს, რომ პარტიის დამფუძნებელმა "თავისი ცხოვრებით" ორდენზე მეტიც კი დაიმსახურა. მას TV პირველის ჟურნალისტმა გუშინ, 9 ივნისს შექმნის პეტიციაზე ჰკითხა, რომლითაც ივანიშვილისთვის ორდენის მინიჭებას ითხოვდნენ.

"კარგი ინიციატივაა, მე დავუჭერდი სიამოვნებით მხარს, მან თავისი ცხოვრებით დაიმსახურა ორდენზე მეტი", — თქვა კახაძემ

მისივე განცხადებით, ივანიშვილს მოპოვებული აქვს ძალიან დიდი ნდობა. აღნიშნა, რომ ყოფილმა პრემიერმა იცის, როგორ უნდა გაიაროს ამ დიდი ქარტეხილების დროს.

"ბიძინა ივანიშვილი მუდმივ გამოწვევებში იყო მთელი თავისი ცხოვრება. მისთვის არ ახალია არც ერთი ახალი გამოწვევა დამატებითი. ამიტომ თავად უწყის, როგორ უნდა გაიაროს ამ დიდი ქარტეხილების დროს, იცის, როგორ უნდა გაამხნეოს სხვები იცის თანადგომის ძალიან დიდი ფასი და თვითონ მთელი ცხოვრება სხვისი თანამდგომი იყო", — აღნიშნა მან.

რეზოლუცია, რომლითაც პრეზიდენტისგან ივანიშვილისთვის ღირსების ორდენის მიცემას ითხოვდნენ, ამ დროისთვის აღარ იძებნება.

ევროპარლამენტმა საქართველოში მედიის თავისუფლების დარღვევებისა და ჟურნალისტების უსაფრთხოების გამოწვევების შესახებ რეზოლუცია მიიღო, რომელსაც მხარი 308 დეპუტატმა დაუჭირა. წინააღმდეგი 218 იყო.

8 ივნისს ევროპარლამენტში ამ საკითხზე დებატები გაიმართა. ევროპარლამენტარებმა საქართველოში მედიაგარემო კრიტიკულად შეაფასეს და შეშფოთება გამოხატეს მთავრობის დამოკიდებულებებზე, რაც რეზოლუციაში დაწვრილებით აისახა.

ტექსტის ერთ-ერთი ყველაზე მნიშვნელოვანი პუნქტი ქართული ოცნების დამფუძნებლის, ბიძინა ივანიშვილისთვის სანქციების დაწესების მოწოდებას და მის კრემლთან ურთიერთობას ეხება. რეზოლუცია საქართველოს მთავრობას ზოგადი პრინციპებისა და მოვალეობების დაცვისკენ მოუწოდებს, ამასთანავე მასში განხილულია კონკრეტული საკითხები, რაზეც ხელისუფლებას შესაბამისი რეაგირება უნდა ჰქონდეს, როგორიცაა 5 ივლისის, ნიკა გვარამიას და მიხეილ სააკაშვილის საქმეები.