ქართული ოცნების დეპუტატის, გია ვოლსკის აზრით, ევროპარლამენტის მიერ მიღებულ რეზოლუციაში "შეუთავსებლობები ბევრია". ის პარტიის თავმჯდომარის, ირაკლი კობახიძის მსგავსად, ამბობს, რომ TV პირველი ოპერატორის, ლექსო ლაშქარავას გარდაცვალების მიზეზი მასზე განხორციელებული ძალადობა არ არის.

"აქ შეუთავსებლობები ძალიან ბევრია და ვიმსჯელოთ ჩვენ პოლიტიკურ ნაწილზე და არა ფაქტობრივ საკითხებზე. რამდენიმე თემა განსაკუთრებით, შეიძლება ხაზგასმით აღინიშნოს, რომ აბსოლუტურად სცილდება რეალობას. კიდევ ერთხელ ვუსამძიმრებ ლაშქარავების ოჯახს, ჩვენ თავსაც, საქართველოს, მაგრამ იგი არ მომკვდარა იმის გამო, არ გარდაცვლილა, რომ ძალადობა ჩაიდინეს მასთან მიმართებაში", — ამბობს ვოლსკი იმედის ეთერში.

რეზოლუცია, რომელიც ევროპარლამენტმა დღეს მიიღო, ერთ-ერთი პუნქტი 5 ივლისის მოვლენებს ეხება, სადაც ევროპარლამენტარები გმობენ ლგბტქი+ ადამიანების მიმართ დისკრიმინაციულ დამოკიდებულებას და ხელისუფლებას დამნაშავეების დასჯისკენ მოუწოდებენ. მათი თქმით, მთავრობამ სრულად უნდა განახორციელოს ადამიანის უფლებათა და ანტიდისკრიმინაციული კანონმდებლობა პრაქტიკაში.

ევროპარლამენტარები აცხადებენ, რომ TV პირველის ოპერატორი ალექსანდრე ლაშქარავა სწორედ 5 ივლისს თავდასხმის შემდეგ მიყენებული დაზიანებების გამო გარდაიცვალა. კობახიძემ ეს პუნქტი უარყო და თქვა, რომ ლაშქარავას "გარდაცვალების რეალური მიზეზი საზოგადოებისთვის კარგად არის ცნობილი.

5 ივლისს, როცა ადამიანები საკუთარი ფუნდამენტური უფლებების დასაცავად რუსთაველის გამზირზე უნდა გამოსულიყვნენ, ჰომოფობიურმა ჯგუფებმა ტერიტორია დაიკავეს და ჟურნალისტებს ფიზიკურად გაუსწორდნენ. თავდასხმის შედეგად დაშავდა 50-ზე მეტი ჟურნალისტი, მათ დაარბიეს თბილის პრაიდის ოფისი, სცადეს სირცხვილიას ოფისში შეჭრა და თავს დაესხნენ ადამიანის უფლებათა ცენტრს, სადაც, სავარაუდოდ, ხელნაკეთი ასაფეთქებელი მოწყობილობა შეაგდეს, რის შედეგადაც ერთი ადამიანი დაშავდა. 11 ივლისს აქციაზე ნაცემი ოპერატორი, ლექსო ლაშქარავა გარდაიცვალა.