აზერბაიჯანელი ჟურნალისტი, აფგან მუხთარლი ევროპარლამენტის რეზოლუციას ეხმაურება, რომელიც ბიძინა ივანიშვილისთვის სანქციების დაწესებას ეხება და ამბობს, რომ ის რუსეთის ერთ-ერთი ყველაზე ერთგული მსახურია. მუხთარლის თქმით, საქართველოდან სწორედ ივანიშვილის დავალებით გაიტაცეს.

"ევროპარლამენტმა ივანიშვილის წინააღმდეგ სანქციების ამოქმედების მოთხოვნით რეზოლუცია მიიღო. დიდება! ივანაშვილი არის ქურდი, მექრთამე და კორუმპირებული. აყალბებს არჩევნებს, კრძალავს დემოკრატიულ არჩევნებს საქართველოში და ამომრჩევლების მოსყიდვით არის დაკავებული.

რუსეთის ერთ-ერთი ყველაზე ერთგული მსახურია ჩვენს რეგიონში. საქართველოდან ჩემი გატაცება და აზერბაიჯანში ექსტრადიცია ივანიშვილის დავალებით მოხდა. ახლაც კი მისი დავალებით არ იძიებენ არც ერთ სისხლის სამართლის საქმეს. მაგრამ იმედია, ამ ქურდსაც ექნება ცოტა დრო ხელისუფლებაში", — წერს ის.

აფგან მუხთარლი 2017 წელს თბილისის ცენტრიდან გაუჩინარდა და მეორე დღეს მოულოდნელად აზერბაიჯანის ციხეში აღმოჩნდა. იგი ამბობს, რომ საქართველოს დედაქალაქიდან კრიმინალური პოლიციის ფორმიანმა პირებმა გაიტაცეს. აზერბაიჯანის ხელისუფლების მტკიცებით, მუხთარლი საზღვრის უკანონო კვეთის გამო დააკავეს.

მუხთარლის დაკავებიდან რამდენიმე კვირაში, აზერბაიჯანის მმართველი გუნდის პარლამენტარმა ელმან ნასიროვმა რადიო თავისუფლებასთან ინტერვიუში თქვა, რომ მუხთარლის დაკავება აზერბაიჯან-საქართველოს სპეცსამსახურების წარმატებული ოპერაცია იყო. საქმეზე გამოძიება საქართველოში ამ დრომდე მიმდინარეობს.

მუხთარლის აზერბაიჯანში 6-წლიანი პატიმრობა მიუსაჯეს. საერთაშორისო ადამიანის უფლებადამცველმა ორგანიზაციებმა იგი პოლიტიკურ პატიმრად აღიარეს. ჟურნალისტი 2020 წლის მარტში გაათავისუფლეს.

2021 წლის 21 აპრილს მას დაზარალებულის სტატუსი მიენიჭა. საქმეზე საგამოძიებო მოქმედებები განახლდა მას შემდეგ, რაც 2021 წლის 7 აპრილს მუხთარლი გერმანიიდან თბილისში ჩამოვიდა.