გავრცელებული ინფორმაციით, ევროპარლამენტმა საქართველოში მედიისა და ჟურნალისტების უსაფრთხო გარემოს შესახებ რეზოლუცია მიიღო, სადაც ბიძინა ივანიშვილისთვის სანქციების დაწესებაზეც არის საუბარი. რეზოლუციას მხარი 308 დეპუტატმა დაუჭირა, 218 კი წინააღმდეგი იყო.

"გამოვხატავთ შეშფოთებას იმ დესტრუქციული როლის გამო, რომელსაც ერთპიროვნული ოლიგარქი ბიძინა ივანიშვილი თამაშობს ქართულ პოლიტიკასა და ეკონომიკაში, შეშფოთებას მთავრობასა და მის გადაწყვეტილებებზე გავლენის დონის გამო, მათ შორის ჟურნალისტებისა და პოლიტიკური ოპონენტების პოლიტიკურად მოტივირებულ დევნასთან დაკავშირებით", — რადიო თავისუფლების ინფორმაციით, წერია რეზოლუციის ტექსტში.

რეზოლუციის შესახებ ინფორმაცია ევროპარლამენტს ჯერ არ გაუსაჯაროებია, თუმცა მედიები, გიორგი კანდელაკი და სალომე სამადაშვილი ამბობენ, რომ მასში ივანიშვილისთვის სანქციების დაწესების პუნქტი თავდაპირველი ვერსიის ტექსტში ჩაამატეს. ამასთანავე, რეზოლუციის შესახებ ბრიფინგი გამართა ქართული ოცნების თავმჯდომარე ირაკლი კობახიძემ.

რადიო თავისუფლების ინფორმაციით, ევროპარლამენტარები ღრმა შეშფოთებას გამოხატავენ ივანიშვილის კავშირების გამო კრემლთან, რაც მათი თქმით, განსაზღვრავს საქართველოს ამჟამინდელი მთავრობის პოზიციას რუსეთის წინააღმდეგ დაწესებული სანქციების მიმართ.

ევროპარლამენტარებმა 8 და 9 ივნისს საქართველოში მედიისა და ჟურნალისტების უსაფრთხო გარემოს შესახებ დებატები გამართეს. მათ საქართველოში მედიაგარემო კრიტიკულად შეაფასეს და შეშფოთება გამოხატეს მთავრობის დამოკიდებულებებზე.

გუშინ, 8 იცნისს დებატებზე ევროპარლამენტარმა მირიამ ლექსმანი განაცხადა, რომ ბიძინა ივანიშვილს სანქციები უნდა დაუწესდეს. მისი თქმით, ეს მნიშვნელოვანია საქართველოს ევროპული გზის მხარდასაჭერად. ხოლო, ანდრიუს კუბოლიუსმა თქვა, რომ საქართველოში მედიათავისუფლება მთავრობის მსხვერპლია, რომელიც სამართლის პოლიტიზირებას ცდილობს.

გაიგე მეტი: