ქართული ოცნების დეპუტატი, მამუკა მდინარაძე ევროპარლამენტარების კრიტიკას საქართველოზე "შეტევას" უწოდებს და ამბობს, რომ ეს "მაინცდამაინც მაშინ მოხდა, როცა გადაწყვეტილებას ველოდებით". ამის შესახებ მან პარლამენტში ჟურნალისტებთან ისაუბრა.

"ეს არ იყო კრიტიკა, მოდი პირდაპირ ვთქვათ. ეს იყო შეტევა საქართველოზე, საქართველოს ხელისუფლებაზე და ძალიან სამწუხაროა, რომ ლობირება ამ დებატების გახსნისა მოხდა მაინცდამაინც ახლა, როცა ყველაზე ნაკლებად სასურველი იყო ამ ქვეყნისთვის და მაინცდამაინც ახლა წამოვიდა ეს შეტევა საქართველოზე, როცა რამდენიმე დღეში გადაწყვეტილებას ველოდებით", — თქვა მან.

გუშინ ევროპარლამენტში საქართველოში მედიის თავისუფლებასა და ჟურნალისტთა უსაფრთხოებაზე იმსჯელეს. გაკეთდა კრიტიკული განცხადებები, მათ შორის, მედიის თავისუფლების საკითხზე. დღეს, 9 ივნისს კი რეზოლუციას მიიღებენ.

გაიგე მეტი: