რუსეთში სურთ, ლიეტუვას დამოუკიდებლობის აღიარება გააუქმონ. სახელისუფლებო მედიების ინფორმაციით, ვლადიმერ პუტინის პარტიის, ერთიანი რუსეთის დეპუტატმა, ევგენი ფედოროვმა სახელმწიფო დუმას წარუდგინა კანონპროექტი, ამ ქვეყნის დამოუკიდებლობის აღიარებაზე უარის თქმის შესახებ.

დეპუტატის მტკიცებით, სსრკ სახელმწიფო საბჭოს დადგენილება ლიეტუვას დამოუკიდებლობის აღიარებაზე უკანონოა, რადგან ის არაკონსტიტუციური ორგანოს მიერ და სსრკ კონსტიტუციის რიგი მუხლის მოთხოვნების დარღვევით მიიღეს. მისი აზრით, კანონდარღვევაა ისიც, რომ ლიეტუვაში სსრკ-დან გამოყოფაზე რეფერენდუმი არ ჩატარებულა. აქვე ის მიუთითებს, რომ რუსეთი სსრკ-ს სამართალმემკვიდრეა.

1990 წლის 11 მარტს ლიეტუვის ახალარჩეულმა პარლამენტმა ერთსულოვანი კენჭისყრით დამოუკიდებლობა გამოაცხადა. საბჭოთა პარლამენტმა ლიეტუვის დამოუკიდებლობა 1991 წლის 6 სექტემბერს აღიარა.