პარტია ლელოს განცხადებით, საქართველოსთან დაკავშირებით, ევროპარლამენტში გამართულმა დებატებმა, დაადასტურა, რომ მთავარი დაბრკოლება საქართველოს ევროპული მომავლისთვის არის ივანიშვილი და ქართული ოცნება. მათივე თქმით, დებატებით ნათელი გახდა, რომ საქართველოს და ქართველ ხალხს ჰყავს უამრავი მხარდამჭერი ევროპული პარლამენტის ყველა პოლიტიკურ ჯგუფში.

"ევროპარლამენტში საქართველოს საკითხზე გამართულმა დებატებმა დაადასტურა, რომ მთავარი დაბრკოლება საქართველოს ევროპული მომავლისთვის არის ივანიშვილი და ქართული ოცნება. ევროპისკენ მიმავალ გზაზე, ჩვენმა პარტნიორებმა ოლიგარქიული მმართველობა, ჟურნალისტების დევნა, სიტყვის თავისუფლების წინააღმდეგ ბრძოლა, დემოკრატიის უკუსვლა და რეფორმების ჩაგდება მთავარ შემაფერხებელ ფაქტორად დაასახელეს", — ვკითხულობთ განცხადებაში.

ლელოს თქმით, "ქართული ოცნების დესტრუქციულმა პოლიტიკამ" შეუძლებელი გახადა, რომ არ ისმოდეს უმწვავესი კრიტიკა, სხვადასხვა პოლიტიკური ჯგუფის წარმომადგენლებისგან.

"ჩვენ დღეს, ევროპის უმაღლესი პოლიტიკური ტრიბუნიდან არაერთხელ გავიგეთ მოწოდება — "მიანიჭეთ საქართველოს კანდიდატის სტატუსი", — ევროპელი პოლიტიკოსების ეს აბსოლუტური მხარდაჭერა, მხოლოდ ქართველ ხალხს ეკუთვნის. მაგრამ, ქართული ოცნების დესტრუქციულმა პოლიტიკამ შეუძლებელი გახადა, რომ მის მიმართ არ ისმოდეს უმწვავესი კრიტიკა, მათ შორის მათი პარტნიორი სოციალისტების და დემოკრატების პოლიტიკური ჯგუფის წარმომადგენლებისგან", — წერია განცხადებაში.

ლელოა აღნიშნავს, რომ ხელისუფლება უნდა დაუბრუნდეს შარლ მიშელის შეთანხმებას, პრეზიდენტმა კი უნდა გამოიყენოს მისთ ხელთ არსებული ნებისმიერი საშუალება, მათ შორის, შეწყალება ნიკა გვარამიასთან დაკავშირებით.

"ეს ყველაფერი წარმოადგენს აუცილებელ პოზიტიურ გზავნილს ევროპელი პარტნიორებისადმი და ერთადერთ გონივრულ გზას ქართველი ხალხის ისტორიული არჩევანისა და ჩვენი ქვეყნის ისტორიული პერსპექტივის გადასარჩენად", — საუბარია განცხადებაში.

გუშინ, 8 ივნისს ევროპარლამენტში საქართველოში მედიის თავისუფლებასა და ჟურნალისტთა უსაფრთხოებაზე იმსჯელეს. გაკეთდა კრიტიკული განცხადებები, მათ შორის, მედიის თავისუფლების საკითხზე.

გაიგე მეტი: