უკრაინის პრეზიდენტის, ვოლოდიმირ ზელენსკის განცხადებით, სევეროდონეცკში დონბასის ბედი წყდება. მისი თქმით, ეს ერთ-ერთი ყველაზე რთული ბრძოლაა ომის განმავლობაში.

"ამ პერიოდის შედეგების მიხედვით, სრულმასშტაბიანი ომის 105-ე დღეს, სევეროდონეცკი რჩება დონბასში დაპირისპირების ეპიცენტრად. ჩვენ ვიცავთ პოზიციებს და დიდ ზარალს ვაყენებთ მტერს. ეს არის ძალიან სასტიკი ბრძოლა, ძალიან რთული, ალბათ ერთ-ერთი ყველაზე რთული ამ ომში. მადლობელი ვარ ყველას მიმართ, ვინც თავს იცავს. ბევრი თვალსაზრისით, იქ წყდება დონბასის ბედი", — ამბობს ის.

ლუგანსკის რეგიონული ადმინისტრაციის ხელმძღვანელის, სერგეი გაიდაის განცხადებით, უკრაინა ახლა მხოლოდ სევეროდონეცკის გარეუბნებს აკონტროლებს. მისი თქმით, აზრი არ აქვს უკრაინელი სამხედროების ქალაქში დარჩენას მას შემდეგ, რაც რუსეთმა დაიწყო ტერიტორიის განადგურება დაბომბვით და საჰაერო დარტყმებით.