გერმანიის ყოფილმა კანცლერმა, ანგელა მერკელმა Deutsche welle-სთან ინტერვიუში 2008 წლის ბუქარესტის სამიტზე ისაუბრა და თქვა, რომ იმ დროს უკრაინისა და საქართველოსთვის MAP-ის მინიჭებას მხარი არ დაუჭირა, რადგან ვლადიმერ პუტინის პერსპექტივიდან, ეს ომის გამოცხადება იქნებოდა.

"ეს არ იყო უკრაინა, რომელსაც დღეს ვხედავთ. ეს იყო უკრაინა, რომელიც პოლიტიკურად დაყოფილი იყო. არ იყო სტაბილური დემოკრატია. როდესაც NATO-ში იღებ ქვეყანას, წევრობის გეგმა ამის ნათელი წინამორბედია, უნდა იცოდე, რომ მაშინ ჩვენ უნდა დავიცვათ ეს ქვეყანა, თუ თავდასხმა იქნება. მეორე, მე ძალიან დარწმუნებული ვიყავი... რომ პუტინი ამას არ დაუშვებდა. მისი პერსპექტივიდან, ეს იქნებოდა ომის გამოცხადება", — განაცხადა მერკელმა.

მერკელმა, ასევე, მიზეზებზე მსჯელობისას ისაუბრა უკრაინაში სისტემური კორუფციის საკითხებზე.

"პრეზიდენტი ზელენსკი მამაცურად იბრძვის კორუფციის წინააღმდეგ, თუმცა იმ დროს უკრაინა ნამდვილად იყო ქვეყანა, რომელიც ოლიგარქების მეირ იმართებოდა, ამიტომ ვერ იტყოდი, რომ კარგი, ხვალ მათ NATO-ში მივიღებთ", — თქვა მან.

2008 წელს ბუქარესტში გამართულ სამიტზე NATO-ს ლიდერებმა საქართველოსთვის MAP-ის მინიჭებაზე უარი თქვეს, თუმცა აღნიშნეს, რომ საქართველო მომავალში აუცილებლად გახდებოდა ალიანსის წევრი.