აპრილში ეკონომიკის ზრდის საკმაოდ ძლიერი მაჩვენებელი დაფიქსირდა. მართალია, წლიური ზრდის ტემპი შემცირდა, თუმცა ეს მხოლოდ მაღალი საბაზო ეფექტის შედეგს წარმოადგენს. ამავდროულად, გასულ კვირაში გამოქვეყნებული მაისის ინფლაციის დინამიკა ფასების კვლავ მზარდ დინამიკაზე მიუთითებს. ამაში, მოლოდინების შესაბამისად, მნიშვნელოვანი წვლილი საცხოვრებელი უძრავი ქონების ქირის მატებამ შეიტანა.

2022 წლისათვის თიბისი კაპიტალის განახლებული მაკრო მოლოდინები, მოგვიანებით, ამავე კვირაში იქნება ხელმისაწვდომი. ამასთან, დღევანდელი გადმოსახედიდან, უკვე შეიძლება ითქვას, რომ ეკონომიკის ზრდის პროგნოზი ადრინდელი 5.5%-ზე მეტიდან, დაახლოებით 7.5%-მდე აიწევს. წლის ბოლო პერიოდის ინფლაციის მაჩვენებელი კი, არსებული 9.5%-დან, როგორც ჩანს, მხოლოდ მცირედით გადაიხრება.

ლარის კურსის მხრივ, თავისთავად, თიბისი ინარჩუნებს შეფასებას, რომლის მიხედვითაც სავალუტო ბაზარზე ვალუტის მიწოდება ძლიერი დარჩება. ამასთან, თუ საერთაშორისო მასშტაბით დოლარი მნიშვნელოვნად არ გაუფასურდა, რაც ახლო მომავლის პერსპექტივა არაა და უფრო მოგვიანებით, შემდეგ წლებშია მოსალოდნელი, მათი აზრით, უფრო მეტად დოლარის შესყიდვის მიმართულებით სავალუტო ინტერვენციებია მოსალოდნელი, ვიდრე ლარის ამასწინანდელ მაქსიმუმთან შედარებით უფრო მკვეთრი გამყარება. ამავდროულად, რადგანაც სებ-ის 24 მაისის სავალუტო ინტერვენციის შემდეგ გაუფასურების მოლოდინები მხოლოდ მცირე ხანს გაგრძელდა, თიბისიში ფიქრობენ, რომ შემდგომ ინტერვენციებს, მოლოდინების ცვლილების კუთხით, ასეთივე ნეგატიური ზეგავლენა არ ექნება.

თიბისის მთავარი ეკონომისტის 6 ივნისის ყოველკვირეულ განახლებას შეგიძლიათ ამ ვებვერდზე გაეცნოთ.