თიბისისა და განახლებადი ენერგიის კომპანია ენოვუსის თანამშრომლობით, მცირე და საშუალო ბიზნესებისთვის კონფერენცია "განახლებადი ენერგია და ენერგოეფექტური ტექნოლოგიები ქართული ბიზნესისთვის" ჩატარდა. კონფერენცია 2 ივნისს თიბისი კონცეპტის სივრცეში ჩატარდა. იგი საქართველოს ბიზნეს საზოგადოებაში განახლებადი ენერგიის, კერძოდ, მზის, წყლისა და ქარის ენერგიის შესახებ ცნობიერების ამაღლებას და მოხმარების გაზრდის მხარდაჭერას ისახავდა მიზნად.

ფორუმში თიბისის, კომპანია ენოვუსის, საქართველოს ენერგეტიკისა და წყალმომარაგების ეროვნული კომისიის (სემეკი), არასამთავრობო ორგანიზაცია CENN-ისა და სხვადასხვა განახლებადი ენერგიის კომპანიის წარმომადგენლებმა მიიღეს მონაწილეობა. მათ განახლებადი ენერგიის ინოვაციური ტექნოლოგიებისა და გადაწყვეტების, ენერგეტიკის სექტორში მდგრადი განვითარების საუკეთესო პრაქტიკის მაგალითების, საქართველოში არსებული განახლებადი ენერგიის ინფრასტრუქტურის, წარმოებისა და მოხმარების წამახალისებელი მექანიზმების შესახებ ისაუბრეს.

თიბისისთვის მნიშვნელოვანია, აამაღლოს ცნობიერება განახლებადი ენერგიის შესაძლებლობების შესახებ, წვლილი შეიტანოს განახლებადი ენერგიის გამოყენების პრაქტიკის დანერგვაში. ეს ხელს შეუწყობს ბიზნესებს, ეფექტიანად უპასუხონ ენერგიაზე გაზრდილ მოთხოვნას, გრძელვადიან პერსპექტივაში დაზოგონ ენერგია და გახდნენ ენერგოდამოუკიდებლები ისე, რომ გარემოს ნაკლები ზიანი მიაყენონ.

აღსანიშნავია, რომ აღნიშნული ღონისძიება 5 ივნისის კვირაში გაიმართა. ამ დღეს აღინიშნება გარემოს დაცვის მსოფლიო დღე.