ლუგანსკის ოლქში დაბომბვის შედეგად 4 ადამიანი, მათ შორის, დედა და შვილი დაიღუპა. ამის შესახებ ინფორმაციას ლუგანსკის რეგიონული სამხედრო ადმინისტრაციის ხელმძღვანელი, სერგეი გაიდაი ავრცელებს.

"3 ივნისს ქალაქ გორსკოეში რუსული არმიის მიერ დაბომბვის შედეგად დედა-შვილი დაიღუპნენ. ზოლოტოეს მცხოვრებმა სიცოცხლისთვის შეუთავსებელი დაზიანებები მიიღო. ასევე, ცნობილი გახდა გორსკოეში, 3 დღის წინ მოკლული ადამიანის შესახებ", — განაცხადა მან.

მისივე თქმით, სევეროდონეცში კვლავ არიან დაჭრილები. გაიდაი დასძენს, რომ ოკუპანტებს ქალაქში დანაკარგი აქვთ, თუმცა, მიუხედავად ამისა, შეტევას აგრძელებენ.

სევეროდონეცკში ახლა მთავარი ბრძოლები მიმდინარეობს. როგორც ლუგანსკის ოლქის ადმინისტრაციის ხელმძღვანელმა, სერგეი გაიდაიმ თქვა, ოკუპანტები სევეროდონეცკის 80%-ს აკონტროლებენ. მისი თქმით, გრძელდება ქუჩებში ბრძოლები.

3 ივნისს ვოლოდიმირ ზელენსკიმ განაცხადა, რომ უკრაინას სევეროდონეცკში გამართულ ბრძოლებში გარკვეული წარმატებები აქვს.