უკრაინის პრეზიდენტის ადმინისტრაციის უფროსი მრჩეველის, მიხაილო პოდოლიაკის განცხადებით, პარტნიორებმა იციან სად გამოიყენება მათი მოწოდებული იარაღი. მისი თქმით, აშშ-სგან მოწოდებულ იარაღს თავდაცვისთვის გამოიყენებენ და არა რუსეთის ობიექტებზე თავდასხმისთვის.

"ნომერ პირველი ამოცანა დღეს რუსეთისთვის — შეარყიოს ნდობა უკრაინასა და აშშ-ს შორის. უკრაინა თავდაცვით ომს აწარმოებს და არ გეგმავს MLRS-ის გამოყენებას რუსეთის ობიექტებზე თავდასხმისთვის. ჩვენმა პარტნიორებმა იციან სად გამოიყენება მათი მოწოდებული იარაღი", — წერს პოდოლიაკი Twitter-ზე.

პირველ ივნისს ცნობილი გახდა, რომ აშშ უკრაინას თანამედროვე სარაკეტო სისტემებსა და საბრძოლო მასალას გადასცემს. მათ შორისაა, HIMARS-ის სისტემები, რომლის მეშვეობითაც რაკეტების გაშვება 80 კილომეტრის რადიუსზე იქნება შესაძლებელი. აშშ-ის სახელმწიფო მდივანმა ასევე თქვა, რომ უკრაინისგან აქვს გარანტიები, რომ მიწოდებულ იარაღს რუსეთის ტერიტოეიაზე არ გამოიყენებს.

კრემლის სპიკერის, დმიტრი პესკოვის განცხადებით, უკრაინისთვის იარაღის გადაცემით აშშ "ცეცხლზე ნავთს ასხამს". მისივე თქმით, ასეთი ქმედებები უკრაინის ხელმძღვანელობის სურვილს, რომ სამშვიდობო მოლაპარაკებები განაახლოს, ხელს არ უწყობს.