ნაციონალური მოძრაობის თავმჯდომარე, ნიკა მელია მთავარი არხის დირექტორის, ნიკა გვარამიას დაპატიმრებაზე აცხადებს, რომ ახლა არა ჭირისუფლობის, არამედ კონსოლიდაციის დროა. მისი თქმით, გეგმა კვლავ უცვლელია და არჩევანი პუტინისა და მისი მოკავშირე ოლიგარქების მხარეს დადგომასა და დემოკრატიულ ფასეულობებს შორისა დგას.

"მე მინდა გავამხნევო მთელი საზოგადოება, ვისაც ნამდვილად აქვს ახლა წუხილი ნიკა გვარამიას დაკავებასთან დაკავშირებით, რომ ბრძოლა გაგრძელდება. ბრძოლა გაგრძელდება მართლაც შეუჩერებელი, უკომპრომისო. ამ ბრძოლის გზაზე შეიძლება კიდევ უფრო მეტი პოლიტიკური პატიმარი ჰყავდეს ქვეყანას. შესაძლებელია, ერთ დროს პოლიტიკური პატიმრები კვლავ პოლიტიკური პატიმრები გახდნენ. შესაძლებელია ათნი, ოცნი დაგვიჭიროს ბიძინა ივანიშვილმა, მაგრამ გეგმას არ უნდა გადავუხვიოთ", — განაცხადა მან.

მელია ამბობს, რომ ამ მძიმე პროცესში დამნაშავეების ძებნის დრო არ არის და დასძენს, რომ ვინც არსებულ ვითარებაში კონკრეტულ ოპოზიციონერ პოლიტიკოსებსა და აქტიურ საზოგადოებრივ ჯგუფებს ადანაშაულებს, ივანიშვილზე მეტად დამნაშავეა.

"ივანიშვილი ხომ აპატიმრებს, ხომ უკანონოდ აღუკვეთს სხვადასხვა დროს მედიამენეჯერებს, თუ პოლიტიკოსებს თავისუფლებას, მაგრამ ადამიანები რომლებიც იქვე არსაიდან გამოჩნდებიან და საუბრობენ, რომ ეს ყველაფერი ერთი ორი აქტიური საზოგადოებრივი ჯგუფის ბრალია საქართველოში, ან თუნდაც ცალკეული პოლიტიკოსების ოპოზიციური პარტიებიდან, ეს ადამიანები თავისი ქმედებით კიდევ უფრო მძიმე მდგომარეობაში აგდებს ქვეყანას, ვიდრე ივანიშვილი, რაც არ უნდა პარადოქსულად მოგეჩვენოთ", — თქვა მელიამ.

დღეს, სასამართლომ მთავარი არხის დამფუძნებელი, ნიკა გვარამია დამნაშავედ ცნო და მას 3 წლითა და 6 თვით პატიმრობა მიუსაჯა. სასჯელის მოხდის ვადა 16 მაისიდან დაიწყო და მოსამართლემ გვარამიას დარბაზშივე დაკავების ბრძანება გასცა.

ნიკა გვარამიას წინააღმდეგ გამოძიება პროკურატურამ 2019 წლის 20 ივლისს დაიწყო. საქმე ეხება ბრალდებას ტელეკომპანია რუსთავი 2-ის კანონიერი ინტერესის საწინააღმდეგოდ უფლებამოსილების ბოროტად გამოყენების შესახებ. კერძოდ, ტელეკომპანიის ყოფილ დირექტორს, ნიკა გვარამიას წინასწარი შეთანხმებით ჯგუფის მიერ სამსახურებრივი მდგომარეობის გამოყენებით, დიდი ოდენობით ქონების გაფლანგვის, კომერციული მოსყიდვის, ყალბი ოფიციალური დოკუმენტის დამზადება-გამოყენებას ედავებოდნენ.

განაჩენის გამოცხადების შემდეგ, სასამართლო დარბაზიდან გვარამიამ დაპოსტა და მოუწოდა ხალხს დარჩნენ მთავარ არხზე და ერთად მოიპოვონ თავისუფლება. არხის ჟურნალისტებმა კი განაცხადეს, რომ ბრძოლა გრძელდება, უფრო მეტად, ვიდრე აქამდე.

საერთაშორისო გამჭვირვალობა საქართველომ აღნიშნა, რომ გვარამიას დასჯით სასამართლომ პოლიტიკური დაკვეთა შეასრულა. GDI-ის ხელმძღვანელმა, ედუარდ მარიკაშვილმა კი თქვა, რომ ეს კიდევ ერთი მაგალითია იმისა, რომ ავტორიტარიზმში ვცხოვრობთ. გიორგი მშვენიერაძის განცხადებით, ამ ქვეყანაში ყველაფერი დანაშაულია, ბიძინა თუ მტრად გთვლის და ყველაფერი კანონიერია, ბიძინას ლაქია თუ ხარ.

ამავე თემაზე: