გამოძიების განახლების მოთხოვნით 6 წლის წინ გარდაცვლილი 23 წლის პროგრამისტის, თამარ ბაჩალიაშვილის მშობლებმა პროკურატურასთან აქცია დღესაც გამართეს.

გარდაცვლილის დედა, თეონა თამაზაშვილი, პროკურატურას საქმის მასალებზე წვდომას სთხოვს.

"ისევ ვაგრძელებთ ყოველ ორშაბათს პერმანენტულ აქციებს. ვინაიდან და რადგანაც მოხსნილი გვაქვს დაზარალებულის სტატუსი, ამის გამო არც მასალებთან გვაქვს წვდომა.

მოვითხოვთ გასაჯაროვდეს დეა კაპანაძის ხუთი ჩვენება და თამართან მისი მიმოწერა, რომელიც თვალნათლივ დაგვანახებს საქმეში ახალ გარემოებებს — იმას, რომ თამარი მოკლულია.

ისევ მივმართავ ხალხს, რომ დამიდექით გვერდში, განსაკუთრებით შვილმკვდარ დედებს, ვინც დაკარგა შვილები, უნდა გავერთიანდეთ და ერთიანი ძალით მოვითხოვოთ სამართლიანობის აღდგენა," — განაცხადა ბაჩალიაშვილის დედამ.

შეგახსენებთ, 2020 წლის 18 ივლისს, 23 წლის პროგრამისტი თამარ ბაჩალიაშვილი დაიკარგა. 5-დღიანი ძებნის შემდეგ, ბაჩიაშვილი თეთრიწყაროს ტყეში, მანქანაში გარდაცვლილი იპოვეს. ახალგაზრდა ქალის გარდაცვალებაზე გამოძიება თავდაპირველად თავისუფლების უკანონოდ აღკვეთის კვალიფიკაციით მიმდინარეობდა. 24 ივლისს საქმეს თვითმკვლელობამდე მიყვანის მუხლიც დაემატა. საბოლოოდ, პროკურატურამ საქმე გახსნილად გამოაცხადა — მათი თქმით, ბაჩიაშვილი მედიკამენტოზური ინტოქსიკაციით გარდაიცვალა.

გარდაცვლილი ქალის ოჯახი ეჭვობს, რომ ბაჩალიაშვილი, სავარაუდოდ, ე.წ ქოლ-ცენტრში მუშაობდა და მისი გარდაცვალებაც მის სამსახურებრივ საქმიანობას უკავშირდება.