ოქტომბერიც დადგა და თუ ფეხქვეშ უკვე პირველმა ფოთოლმა გაგიხრაშუნა, დროა, შინ მყუდროდ მოკალათდე და ზებუნებრივ არსებებზე სერიალს ჩაუჯდე.

სამარადისოდ შენი ვარ ("Eternally Yours") — ასე ჰქვია ახალ ამერიკულ სიტკომს, რომელიც ვამპირი წყვილის შესახებ გვიყვება. ჩარლზი და ლიზი უკვე 500 წელია, ცოლ-ქმარი არიან, მაგრამ ქორწინება, რომელმაც საუკუნეებს გაუძლო, ახლა კრიზისშია. მე-16 საუკუნეში, როცა ჩარლზმა სასხვათაშორისოდ ჩაახველა, თავდავიწყებით შეყვარებულმა ლიზმა აღუთქვა, მინდა, სამყაროს აღსასრულამდე შენი ხველა მაღვიძებდესო. ასე აგიხდეთ ყველაფერი... უკვე ხუთი საუკუნეა, ლიზს ჩარლზის პერიოდული და გაუთავებელი ჩახველებების მოსმენა უწევს.

ხუთსაუკუნოვანი წყვილი კლანის სხვა ვამპირებთან და შვილთან ერთად ცხოვრობს. ისედაც კრიზისში შესულ ურთიერთობას კი ზემოდან მოკვდავი სასიძო ემატება — შვილს სახლში ადამიანი შეყვარებული მოჰყავს... სერიალში მოქმედება თანამედროვე სიეტლში ვითარდება, მაგრამ ვამპირების უკეთ გასაცნობად რეტროსპექტივაშიც ვიხილავთ საუკუნეების წინანდელ ამბებს.

Eternally Yours-ის შემქმნელები ჯო პორტი და ჯო ვაისმენი არიან, რომლებსაც ასევე უმუშავიათ ბოლო წლების ერთ-ერთ ყველაზე პოპულარულ სიტკომზე მოჩვენებები ("Ghosts").

"ხომ ყველამ ვიცით ბინდში ის სცენები, ბელა რომ თავგამოდებით ითხოვს ვამპირად გადაქცევას", — ჰყვება ვაისმენი, რომელიც თურმე ჩარლზის მსგავსი სასხვათაშორისო ჩახველებებით თამაშობს პორტის ნერვებზე, — "ვიფიქრეთ, ბევრი ვერ იაზრებს, გრძელვადიან პერსპექტივაში რა შედეგები შეიძლება მოჰყვეს მუდამ ერთად ყოფნას და საუკუნეების განმავლობაში გვერდიგვერდ ცხოვრებას. ეს მართლა შემაწუხებელი შეიძლება გახდეს".

Eternally Yours-ის პრემიერა 8 ოქტომბერს შედგა და ახალ სერიებს მაყურებელი ხუთშაბათობით იხილავს ხოლმე.

თუ სერიალებს თვალს აქტიურად ადევნებ, არ დაგავიწყდეს, შემოიხედო ჩვენს ჯგუფშიც – ერთი სერიაც და…