უკრაინის საგარეო საქმეთა მინისტრი ანდრეი სიბიჰა X-ზე წერს, რომ გერმანელ კოლეგას, იოჰან ვადეფულს რუსეთის წინააღმდეგ ზეწოლის გასაძლიერებლად მისაღები მნიშვნელოვანი გადაწყვეტილებების შესახებ ესაუბრა.

მისი თქმით, გერმანელ კოლეგას აცნობა, რომ რუსეთმა ხარკოვის თბოელექტროცენტრალ CHP-5-ზე დარტყმა განახორციელა. სიბიჰას განცხადებით, რუსეთმა ენერგეტიკული ცეცხლის შეწყვეტის შეთანხმება მისი გამოცხადებისთანავე დაარღვია. მან კიდევ ერთხელ დაადასტურა უკრაინის მზადყოფნა ენერგეტიკულ ობიექტებზე თავდასხმების სრულად შეწყვეტის შესახებ შეთანხმებისთვის, იმ პირობით, რომ რუსეთი უკრაინის ენერგეტიკულ ინფრასტრუქტურაზე თავდასხმებს შეწყვეტს.

სიბიჰას თქმით, რუსეთის აგრესიას სიმტკიცე, ერთიანობა და გადამწყვეტი მოქმედებები უნდა დაუპირისპირდეს. მათ შორის, უკრაინისთვის დამატებითი სამხედრო დახმარების პაკეტების გამოყოფა, ევროკავშირში გაწევრიანების მოლაპარაკებების თავების გახსნა და გაყინული რუსული აქტივების სრულად გამოყენება. უკრაინის საგარეო საქმეთა მინისტრმა გერმანიას უკრაინის მხარდაჭერაში ლიდერობისთვის მადლობა გადაუხადა და აღნიშნა, რომ თანამშრომლობა გერმანიის ეკონომიკასაც მოუტანს კონკრეტულ სარგებელს — ენერგეტიკული თანამშრომლობის, თავდაცვის სფეროში ერთობლივი წარმოებისა და გერმანული კომპანიებისთვის უკრაინის აღდგენის პროექტებში მონაწილეობის შესაძლებლობის სახით.

შეგახსენებთ, რომ "ენერგეტიკული ზავი" 2026 წლის 11 ოქტომბერს აშშ-ის პრეზიდენტმა დონალდ ტრამპმა გამოაცხადა. რის შემდეგაც რუსეთი და უკრაინა შეთანხმდნენ, დაუყოვნებლივ შეეწყვიტათ ერთმანეთის ენერგეტიკულ ინფრასტრუქტურაზე თავდასხმები. თუმცა, Reuters-ის ცნობით, განცხადების შემდეგ არც მოსკოვს და არც კიევს არ დაუდასტურებია შეთანხმების პირობები. უკრაინის პრეზიდენტმა ვოლოდიმირ ზელენსკიმ თქვა, რომ უკრაინა ზავს მხარს უჭერდა, მაგრამ აშშ-ისგან დეტალებს ელოდება.

ტრამპის განცხადებამდე ვოლოდიმირ ზელენსკიმ ABC News-თან ინტერვიუში აღნიშნა, რომ უკრაინაში არჩევნები ჩატარდება, თუ რუსეთი 60-დღიან სრულ ცეცხლის შეწყვეტას დათანხმდება.