სახალხო დამცველის ინიციატივით შექმნილი ექიმთა კონსილიუმის წევრის, ნევროლოგ თენგიზ წულაძის განცხადებით, ექსპრეზიდენტი მიხეილ სააკაშვილი მედიკამენტურთან ერთად ფიზიკურ და ფსიქოლოგიურ რეაბილიტაციასაც საჭიროებს. წულაძის ინფორმაციით, მან სააკაშვილის ბოლო 11 იანვარს მოინახულა.

"პაციენტის მდგომაროება რჩება საყურადღებო. კვლავ რჩება ნევროლოგიური სიმპტომატიკა. ის არ გაუმჯობესებულა, 12 დეკემბრის ვიზიტის მერე დაახლოებით ერთი და იგივე დონეზე დგას. გამოხატულია პოლინეიროპათიის სიმპტომატიკა, მხედველობითი სიმპტომატიკა, წონასწორობის დარღვევა, სისუსტე. ასევე, რჩება ანემია, თუმცა ეს მანამდეც იყო. პოსტტრამვული, სტრესული აშლილობა და დეპრესია, რომელიც არ შეფასებულა ბოლო ვიზიტზე, მართალია, ვიხელმძღვანელეთ 12 დეკემბრის დიაგნოზით და პაციენტი დაახლოებით იგივე მდგომარეობითაა ახლაც.

ჩვენი დასკვნა არის, რომ გარდა მედიკამენტური მკურნალობისა, რომელიც მეტ-ნაკლებად დამაკმაყოფილებელია და ასე თუ ისე მიმდინარეობს, ვფიქრობთ, რომ მკურნალობაში უნდა ჩაერთოს ფსიქოლოგიური და ფიზიკური რეაბილიტაცია, რომელიც, მიგვაჩნია, რომ საპატიმროს პირობებში ნაკლებად რეალისტურია, თუმცა შეუძლებელი არ უნდა იყოს და მაინც უნდა იყოს ნაცადი", — აცხადებს ექიმი და დასძენს, რომ აღნიშნული პრობლემები ექსპრეზიდენტის სასჯელაღსრულებით დაწესებულებაში ყოფნის შედეგია.

თენგიზ წულაძე აცხადებს, რომ ფსიქოთერაპია და ფიზიკური რეაბილიტაცია ხელს შეუწყობს სააკაშვილისთვის ადეკვატური კვების რეჟიმის აღდგენასაც. გარდა ამისა, ნევროლოგი ფიქრობს, რომ საჭიროა მაგნიტორეზონანსული კვლევის ჩატარებაც და ნევროლოგის მუდმივი მონიტორინგი.

რაც შეეხება ექსპრეზიდენტის უცხოეთში გადაყვანის საჭიროებას, წულაძე ამბობს, რომ მათ მიერ გაცემული რეკომენდაციების შესრულება საქართველოშიცაა შესაძლებელი.

სახალხო დამცველის მიერ შექმნილმა ექიმთა კონსილიუმმა მიხეილ სააკაშვილის შესახებ მორიგი დასკვნა წარადგინა. ნინო ლომჯარიამ განაცხადა, რომ აქამდე გაცემული რეკომენდაციები შესრულებული არ არის. მისი თქმით, თუ ვითარება არსებითად არ შეიცვლება, ისინი ექსპრეზიდენტთან დამატებით ვიზიტს აღარ განახორციელებენ.