რუსეთში, კურსკის ოლქში, 42 წლის მამაკაცს ქართველების მისამართით შეურაცხმყოფელი კომენტარისა და "საქართველოს განადგურების" მოწოდების გამო 10 ათასი რუბლის (დაახლოებით 310 ლარი) ოდენობის ჯარიმა დააკისრეს. ინფორმაციას "რადიო თავისუფლება" ავრცელებს.

სასამართლოს 2 ოქტომბრის განჩინების თანახმად, დაჯარიმებული მოქალაქე ილია რიაბიჩენკოვია. გადაწყვეტილებაში მითითებულია რუსეთის კონსტიტუციის ის მუხლიც, რომელიც ეროვნული, რასობრივი თუ რელიგიური შუღლის გაღვივებას, ასევე რომელიმე ჯგუფის უპირატესობის პროპაგანდას კრძალავს.

საქმის მასალების მიხედვით, აგვისტოში რიაბიჩენკოვმა სოციალურ ქსელ VKontakte-ში ნახა ვიდეორგოლი, სადაც ასახული იყო კახეთში, სასტუმრო "აგარანის მამულში" რუს ტურისტზე თავდასხმა.

"2008 წელს იქ ყველაფერი უნდა გაენადგურებინათ, რომ ქვის ხანაში ეცხოვრათ", — დაწერა რიაბიჩენკოვმა ვიდეოს კომენტარებში.

მისი კომენტარი რუსეთის ექსტრემიზმთან ბრძოლის ცენტრის წარმომადგენლებმა აღმოაჩინეს, რის შემდეგაც საქმე ადმინისტრაციულ სამართალდარღვევათა კოდექსის 20.3.1 მუხლით აღიძრა, რაც სიძულვილისა და მტრობის გაღვივებას გულისხმობს.

პროცესზე ბრალდებულმა დანაშაული აღიარა და ინანიებდა. სასამართლომ მისი უმუშევრობის ფაქტი გაითვალისწინა და 10 ათასი რუბლის ოდენობის ჯარიმა დააკისრა.

შეგახსენებთ, რომ 18 ივლისს, თელავში, სასტუმრო "აგარანის მამულში" ინციდენტი მოხდა. ქორწილის მსვლელობისას, სასტუმროს მესამე სართულზე, ერთ-ერთ ნომერში მყოფმა უცხო ქვეყნის მოქალაქე ქალებმა შეურაცხყოფა მიაყენეს ქორწილის სტუმრებს და სითხე დაასხეს. რის შემდეგაც სიძის ძმამ, გიორგი ჭიღლაძემ ნომერში მყოფ ერთ-ერთ ქალს დაარტყა.