"რადიო თავისუფლების" ჟურნალისტმა ირაკლი კობახიძეს დამატებით 25 ლარით პენსიების მატებასთან დაკავშირებით დაუსვა კითხვა. კერძოდ, იყო თუ არა პენსიის ოდენობის გაზრდა განპირობებული საზოგადოების კრიტიკით.

კობახიძის განმარტებით, თუ არც ერთი მთავრობის წევრი არ აიღებს ხელფასს, პენსია 3 ლარზე ნაკლებით გაიზრდება. მისი თქმით, მაღალჩინოსნების ხელფასები ბიუჯეტის 0.1%-ზე ნაკლებია.

"საჯარო პოლიტიკური თანამდებობის პირების ხელფასები ერთად დავაჯამოთ და წარმოვიდგინოთ, რომ არცერთი საჯარო პოლიტიკური თანამდებობის პირი არ იღებს ხელფასს — არც პრეზიდენტი, არც პრემიერმინისტრი, არც პარლამენტის თავმჯდომარე, არც ერთი დეპუტატი, არც ერთი მინისტრი, არც ერთი მინისტრის მოადგილე, სულ გავანულოთ ეს ხელფასები თეორიულად, პენსია გაიზრდებოდა 3 ლარზე ნაკლებით. ასეთია მომცემულობა. ამ ხელფასების ჯამი არის ბიუჯეტის 0.1%-ზე ნაკლები. ამიტომ როცა შედარება მოგყავთ, ადარებენ ხოლმე, რომ ერთ დეპუტატს მაგალითად აქვს 30 პენსიონერის ხელფასი ან პრემიერმინისტრს, პრეზიდენტს აქვს 40 პენსიონერის ხელფასი, შეგიძლიათ ნახოთ გერმანია, სადაც ანალოგიურია, გერმანიაში მინიმალური პენსიასა და კანცლერის ხელფასს შორის დაახლოებით 30-მაგი სხვაობაა," — განაცხადა ირაკლი კობახიძემ.

შემდეგ კობახიძემ მინისტრების ხელფასსა და პენსიებს შორის სხვაობაზე ისაუბრა და მაგალითად კერძო სექტორში გაზრდილი ანაზღაურება მოიყვანა. მისივე თქმით, თუ მთავრობის წარმომადგენლებს 12 000 ლარზე ნაკლები ხელფასი ექნებათ, ეს კორუფციას წაახალისებს.

"მინისტრებზე სპეკულირებენ, რომ პენსიონერზე 30-ჯერ მეტი ხელფასი აქვთ. სრული პასუხისმგებლობით ვამბობ, რომ მინისტრს თუ მისცემ იმაზე ნაკლებ ხელფასს, რაც აქვს, 12 000 ლარზე ნაკლებს თუ აძლევ მინისტრს, ეს ნიშნავს იმას, რომ უბიძგებ კორუფციისკენ. კერძო სექტორში ხელფასები არის რადიკალურად გაზრდილი და მინისტრი რა საქმესაც აკეთებს და რა პასუხისმგებლობაც აქვს, იმის ანალოგიურ პოზიციაზე კერძო სექტორში მას ექნებოდა დაახლოებით მინიმუმ 50 000 და 100 000 ლარი ხელფასი და ჩვენ უნდა ვთქვათ, რომ 12 000 ლარი მინისტრისთვის არის ბევრი, ნორმალურია ეს? არ არის ბევრი მინისტრს 12 000 ლარი ხელფასი აუცილებლად უნდა ჰქონდეს," — განაცხადა კობახიძემ.

ჟურნალისტის კითხვაზე, "ჰქონდათ თუ არა ქართული ოცნების ყოფილ წევრებს კორუფციისკენ ბიძგი", კობახიძემ განმარტა, რომ იმ პერიოდში "ხელფასი არ იყო გამოწვევებისა და პასუხისმგებლობის ადეკვატური". მან ასევე აღნიშნა, რომ ადრე პარტიის დამფუძნებელი, ბიძინა ივანიშვილი, "საკუთარი სახსრებით უფინანსებდა საჯარო მოსამსახურეებს ხელფასის დანამატებს, რაც ანტიკორუფციული ზომა იყო".

შეგახსენებთ, ირაკლი კობახიძემ ბრიფინგზე განაცხადა, რომ 70 წლამდე ასაკის პენსიონერებისთვის განკუთვნილი პენსია, ნაცვლად ინდექსაციის წესით გათვალისწინებული 20 ლარისა, 45 ლარით გაიზრდება.