პრემიერმა კობახიძემ დღეს გამართულ ბრიფინგზე იმედი გამოთქვა, რომ რუსეთი ზოგიერთი ქართული კომპანიის ნაწარმის იმპორტის აკრძალვის გადაწყვეტილებას შეცვლის.

მისივე თქმით, გარკვეულ ქართულ პროდუქციაზე ემბარგოს დაწესებამდე რუსულ მხარეს საქართველოს ხელისუფლების წარმომადგენლებთან კომუნიკაცია არ ჰქონია. ამას გარდა, პრემიერმა აღნიშნა, რომ საქართველოს მთავრობა რუსეთის მიერ ქართული პროდუქციის რუსეთში შეტანის აკრძალვის მიზეზების გარკვევას აპირებს.

"ჩვენთვის ეს ინფორმაცია [რის საფუძველზე მოხდა აკრძალვა] არ გაუზიარებიათ. რაც შეეხება დოკუმენტს, ჩვენ ნანახი გვაქვს რაღაც სოციალური დოკუმენტი, რომელიც გამოიცა ამ საქმესთან დაკავშირებით, სადაც ძალიან ზოგადად არის განმარტებული მიზეზი, ფაქტობრივად არც არის განმარტებული მიზეზი. მხარეებს შორის კომუნიკაციას რაც შეეხება, არის სატრანზიტო არხები, მათ შორის სამინისტროს შესაბამისი რგოლი დაუკავშირდება კოლეგებს. გავერკვევით საკითხში და იმედი გვაქვს, რომ შემობრუნდება ეს გადაწყვეტილება", — განაცხადა კობახიძემ.

რუსული მედიის ცნობით, "როსპოტრებნადზორმა" (მომხმარებელთა უფლებების დაცვისა და სანიტარიულ-ეპიდემიოლოგიური ზედამხედველობის სახელმწიფო უწყებამ) ქართული სასმელების — ღვინის, კონიაკის, ლუდის, მინერალური წყლისა და გაზიანი სასმელების ნაწილის რუსეთში იმპორტი და გაყიდვა დროებით აკრძალა. გადაწყვეტილება ევრაზიის ეკონომიკური კომისიის საბჭოს დადგენილებას ეფუძნება.