ევროსაბჭომ 77 ფიზიკურ პირს, რომლებიც რუსეთის სახელმწიფო დუმის იმ ე.წ. "არჩევნებში" მონაწილეობდნენ, რომელიც რუსეთის მიერ უკრაინის ოკუპირებულ ტერიტორიებზე ჩატარდა, შეზღუდვები დაუწესა.

ევროკავშირმა ცალსახად დაგმო უკრაინის დროებით ოკუპირებულ ტერიტორიებზე ამ ე.წ. "არჩევნების" ორგანიზება, რაც არღვევს უკრაინულ და საერთაშორისო სამართალს, მათ შორის გაეროს წესდებას, და ლახავს უკრაინის დამოუკიდებლობას, სუვერენიტეტსა და ტერიტორიულ მთლიანობას.

"დღეს შეთანხმებული სასანქციო სია მოიცავს 74 კანდიდატს, რომლებიც სხვადასხვა პარტიის სახელით იყრიდნენ კენჭს ე.წ. "დონეცკის სახალხო რესპუბლიკაში", ე.წ. "ლუგანსკის სახალხო რესპუბლიკაში", ზაპოროჟიესა და ხერსონის ოლქებში, ასევე ე.წ. "ყირიმის რესპუბლიკასა და ქალაქ სევასტოპოლში". რუსეთის სახელმწიფო დუმის "არჩევნებში" მონაწილეობით ამ პირებმა აქტიური წვლილი შეიტანეს უკრაინის წინააღმდეგ რუსეთის აგრესიული ომის ლეგიტიმაციის მცდელობასა და უკრაინის ტერიტორიების უკანონო ოკუპაციის მხარდაჭერაში", — წერია ევროსაბჭოს მიერ გავრცელებულ ინფორმაციაში.

იმავე მიზეზების გამო, საბჭომ შეზღუდვები დააწესა რუსეთის ფედერაციის ცენტრალური საარჩევნო კომისიის სამ წევრზე, რომლებმაც ე.წ არჩევნების ორგანიზება უზრუნველყვეს.

სანქცირებულ პირებზე ვრცელდება მოგზაურობის აკრძალვა, რაც მათ ევროკავშირის ტერიტორიაზე შესვლას ან ტრანზიტით გავლით გადაადგილებას უკრძალავს, ასევე გაიყინება მათი აქტივებიც. გარდა ამისა, ევროკავშირის მოქალაქეებსა და კომპანიებს ეკრძალებათ მათთვის ფინანსურ სახსრებზე, ფინანსურ აქტივებზე ან ეკონომიკურ რესურსებზე წვდომის მიცემა.