BMG-ის ცნობით, მამუკა მდინარაძემ საკონსულტაციო კომპანია "მდინარაძის საკონსულტაციო ჯგუფი" დააფუძნა.

სახელმწიფო უსაფრთხოების სამსახურის ყოფილმა ხელმძღვანელმა, რომელმაც თანამდებობა 27 აგვისტოს დატოვა, საჯარო რეესტრს შპს "მდინარაძის საკონსულტაციო ჯგუფის" დარეგისტრირებისთვის მიმართა. ახლადდაფუძნებულ კომპანიაში 100%-იან წილს თავად მდინარაძე ფლობს, ხოლო დირექტორის პოსტი ნინო ჭანტურიამ დაიკავა.

შეგახსენებთ, მამუკა მდინარაძემ 27 აგვისტოს თანამდებობა დატოვა და პოლიტიკიდან წავიდა, — ამის შესახებ მან მთავრობის ადმინისტრაციაში გამართულ ბრიფინგზე განაცხადა. მდინარაძემ პოლიტიკაში ყოფნის 10 წელი "შრომის, სამშობლოს ერთგულების და მეგობრებთან ერთად დიდი საქვეყნო საქმის კეთების პერიოდად შეაფასა".

ცნობისთვის, სამართალდამცავი ორგანოების კოორდინაციის საკითხებში სახელმწიფო მინისტრად მამუკა მდინარაძე მიმდინარე წლის 30 აპრილს დაინიშნა. მანამდე ის სახელმწიფო უსაფრთხოების სამსახურის უფროსი იყო. სუს-ში მდინარაძის ადგილი გეკა გელაძემ დაიკავა.