ოკუპირებულ აფხაზეთში შეიარაღებული ძალების ოპერატიულ-ტაქტიკური სწავლება დაიწყო, რომელიც 12 ოქტომბრიდან 16 ოქტომბრამდე გაგრძელდება. სწავლების დაწყებასთან დაკავშირებით, დე ფაქტო პრეზიდენტმა და შეიარაღებული ძალების ე.წ მთავარსარდალმა ბადრა გუნბამ უშიშროების საბჭოს სხდომა გამართა.

გუნბას განცხადებით, სწავლების მთავარი მიზანია ჯარების მართვის მეთოდების დახვეწა, ოფიცერთა შემადგენლობისთვის პრაქტიკული გამოცდილების შეძენა და საოკუპაციო რეჟიმისა და რუსეთის ფედერაციის შეიარაღებულ ძალებს შორის ურთიერთქმედების დამუშავება.

სწავლება ჯარების უმაღლეს საბრძოლო მზადყოფნაში მოყვანით დაიწყო. ე.წ. სამხედრო კომისარიატები მობილიზაციურ საკითხებს ადგილობრივი ხელისუფლების ორგანოებთან მჭიდრო თანამშრომლობით წყვეტენ.

სხდომაზე მოხსენებით გამოვიდა გენერალური შტაბის უფროსი ვლადიმერ სავჩენკო, რომელმაც ე.წ. მთავარსარდალს სწავლების ძირითადი ეტაპები და ჯარების დაჯგუფებების კოორდინაციის გეგმა წარუდგინა.

გუნბამ კონკრეტული დავალებები მისცა დე ფაქტო უწყებების ხელმძღვანელებს: პრემიერმინისტრს დაევალა ტერიტორიული თავდაცვის შტაბების მუშაობაზე კონტროლი, მინისტრთა კაბინეტის ოპერატიული ჯგუფი მუდმივ რეჟიმში იმუშავებს შტაბის შემადგენლობაში, ხოლო ძალოვან სტრუქტურებს დაევალათ დაქვემდებარებული დანაყოფების სრული ჩართულობა საბრძოლო განრიგის შესაბამისად.