შინაგან საქმეთა სამინისტროში განმარტავენ, თუ რატომ არ მისცეს ევროპული საქართველოს ლიდერს, გიგი უგულავას საზღვრის გადაკვეთის უფლება.

როგორც უწყებაში ამტკიცებენ, მათ არ მიუღიათ სასამართლოს გადაწყვეტილება, რომელიც პასპორტის და პირადობის მოწმობის ჩაბარების ვალდებულების გაუქმებას ითვალისწინებს, რის გამოც ბაზაში მონაცემები დარჩა უცვლელი. ამასთან, სამინისტროში ამბობენ, რომ ამ ეტაპზე გიორგი უგულავას ბაზაში შეზღუდვა არ უფიქსირდება.

"შოთა რუსთაველის სახელობის თბილისის საერთაშორისო აეროპორტში გიორგი უგულავას ბ.გ.-ს მიმართ განხორციელებული ძალადობის ფაქტზე 2019 წლის 12 დეკემბერს, აღკვეთის ღონისძიების სახით შეეფარდა გირაო 2 000 ლარი, ხოლო დამატებითი ღონისძიების სახით განესაზღვრა საქართველოს მოქალაქის პასპორტის და პირადობის დამადასტურებელი დოკუმენტის ჩაბარების ვალდებულება.

საქართველოს უზენაესი სასამართლოს გადაწყვეტილებით, ე.წ. ფონდების საქმეზე, გიორგი უგულავას მიესაჯა საპატიმრო სასჯელი, ხოლო აეროპორტში მომხდარი ძალადობის საქმეზე სასამართლო განხილვის ეტაპზე, გაუქმდა მის მიმართ გამოყენებული აღკვეთის ღონისძიება გირაო და დამატებითი ვალდებულება პასპორტის და პირადობის მოწმობის ჩაბარების თაობაზე. პასპორტის და პირადობის მოწმობის ჩაბარების ვალდებულების გაუქმების შესახებ გადაწყვეტილება, შინაგან საქმეთა სამინისტროს არ მიუღია, შესაბამისად ბაზაში მონაცემები დარჩა უცვლელი", — ნათქვამია შსს-ს განცხადებაში.

დღეს, 23 იანვარს გიგი უგულავამ განაცხადა, რომ თბილისის საერთაშორისო აეროპორტიდან საზრვრის კვეთის უფლება არ მისცეს.