ევროპული საქართველოს წევრის, ლევან თარხნიშვილის განცხადებით, თალაკვაძემ რწმენა, რომ ოპოზიცია მალე საპარლამენტო პროცესებში მონაწილეობას მიიღებს, ნაადრევი საახალწლო ზეიმია.

"ძალიან რთულია არასერიოზული ადამიანის არასერიოზულ კომენტარზე კომენტარის გაკეთება, მით უმეტეს, რომ ამ არასერიოზულ ადამიანს არავინ არაფერს ეკითხება. ნამდვილად ვერ გეტყვით, რა დაესიზმრა არჩილ თალაკვაძეს, ეტყობა, საახალწლო ზეიმი ცოტა ადრე დაიწყო. არაფერი შეცვლილა, ოპოზიციამ არაერთხელ დაამტკიცა, რომ არის ერთიანი", — განაცხადა ლევან თარხნიშვილმა.

საქართველოს პარლამენტის თავმჯდომარის, არჩილ თალაკვაძის თქმით, სჯერა, რომ ოპოზიცია უახლოეს დღეებში საპარლამენტო პროცესში მონაწილეობას დაიწყებს.

"მე გარწმუნებთ, უახლოეს დღეებში უკვე მოხდება გარდატეხა და ოპოზიცია დაიწყებს მონაწილეობას საპარლამენტო პროცესში. მე ვიცი, რომ ეს ზოგიერთებს ძალიან ეწყინებათ — ამ ოპოზიციაში, რადიკალურ ნაწილს, მაგრამ, საბედნიეროდ, ოპოზიციას ჰყავს ისეთი ადამიანებიც, რომლებიც პატივს სცემენ საკუთარ ამომრჩევლების არჩევანს, პატივს სცემენ სახელმწიფო ინტერესებს", — ამბობს თალაკვაძე.

31 ოქტომბერს გამართული საპარლამენტო არჩევნების შედეგებს ოპოზიცია არ აღიარებს. მათ უარი თქვეს მეორე ტურში მონაწილეობაზე და არ აპირებენ პარლამენტში შესვლას. პოლიტიკური კრიზისიდან გამოსავლის საპოვნელად აშშ-სა და ევროკავშირის ელჩების შუამავლობით მმართველი პარტიისა და ოპოზიციურ პარტიებს შორის მოლაპარაკებები მიმდინარეობს. ოპოზიცია მოითხოვს ჩატარდეს რიგგარეშე არჩევნები, გათავისუფლდნენ პოლიტპატიმრები და გადადგეს ცენტრალური საარჩევნო კომისიის თავმჯდომარე, თამარ ჟვანია. ქართულ ოცნებაში ამბობენ, რომ რიგგარეშე არჩევნების ჩატარების საკითხი არ განიხილება.