გპარავთ თუ არა ხელფასს თქვენი დამსაქმებელი — ამის გარკვევას დღეიდან მოპარული ხელფასის გამომთვლელის საშუალებით შეძლებთ, რომელიც ღირსეული შრომის პლატფორმამ შექმნა. ხელფასის გამომთვლელის პრეზენტაცია ადამიანის უფლებათა კვირეულის ფარგლებში 9 დეკემბერს გაიმართა.

ღირსეული შრომის პლატფორმაში აცხადებენ, რომ მოპარული ხელფასის გამომთვლელის შექმნის საჭიროება საქართველოში დასაქმებულთათვის კუთვნილი ანაზღაურების მოპარვის გავრცელებულმა პრაქტიკამ განაპირობა.

"ხელფასის მოპარვა გულისხმობს აუნაზღაურებელ ზეგანაკვეთურ შრომას, აუნაზღაურებელ შრომას არასამუშაო საათებში, ხელფასის უკანონო დაქვითვას, გადაუხდელ ფეხის ქირას [ეგრეთწოდებული ჩაი, თიფსი] და მშრომელთათვის კუთვნილი შრომის ანაზღაურების დასაქმებულის მიერ სხვა სახით უკანონო მითვისებას", — განმარტავენ პლატფორმაში.

მოპარული ხელფასის გამომთვლელით დახმარებით შეგიძლიათ დაადგინოთ, რამდენად ხართ მოპარული ხელფასის მსხვერპლი და დაახლოებით, გამოითვალოთ ის თანხა, რომელიც დამსაქმებელმა თქვენი კუთვნილი ანაზღაურებიდან მიითვისა.

გამომთვლელი დაგისვამთ მარტივ შეკითხვებს, რასაც 5-დან 10 წუთამდე დასჭირდება. კითხვებზე პასუხის შემდეგ კი თქვენი სახელფასო დანაკარგი დაიანგარიშდება.