მთავარი არხის გენერალური დირექტორის, ნიკა გვარამიას სასამართლო პროცესი გადაიდო. აღნიშნულის შესახებ გვარამიას ადვოკატმა, დიტო საძაგლიშვილმა განაცხადა.

"სასამართლოდან შემატყობინეს, რომ პროცესები არის განუსაზღვრელი ვადით გადადებული და მოგივნებით შეგვატყობინებენ სხდომის თარიღს. რაც შეეხება მიზეზს, როგორც სასამართლოს წარმომადგენელმა განმიმარტა იუსტიციის საბჭოს მიერ გუშინ მიღებული იქნა რეკომენდაციები პანდემიასთან დაკავშირებით პროცესების ჩატარების თაობაზე და აი ამ გადაწყვეტილებიდან გამომდინარე მათ გადადეს სასამართლოს სხდომა", — თქვა საძაგლიშვილმა.

ნიკა გვარამიას წინააღმდეგ გამოძიება პროკურატურამ 2019 წლის 20 ივლისს დაიწყო. საქმე ეხება ბრალდებას ტელეკომპანია რუსთავი 2-ის კანონიერი ინტერესის საწინააღმდეგოდ უფლებამოსილების ბოროტად გამოყენების შესახებ. კერძოდ, ტელეკომპანიის ყოფილ დირექტორს, ნიკა გვარამიას წინასწარი შეთანხმებით ჯგუფის მიერ სამსახურებრივი მდგომარეობის გამოყენებით, დიდი ოდენობით ქონების გაფლანგვის, კომერციული მოსყიდვის, ყალბი ოფიციალური დოკუმენტის დამზადება-გამოყენებას ედავებიან. მას, ასევე, ბრალად ედება ფულის გათეთრება.

11 აგვისტოს რუსთავი 2-ის ყოფილ დირექტორს სასამართლომ აღკვეთის ღონისძიებად 40 ათასი ლარის ოდენობით გირაო შეუფარდა და პროკურატურის ნებართვის გარეშე ქვეყნის დატოვება აუკრძალა.