იუსტიციის სახლში ახალშობილთა მშობლებისთვის 25-ლარიან სასაჩუქრე ვაუჩერის გადაცემაზე ნეგატიურ გამოხმაურებებს სამწუხარო და სამარცხვინო უწოდეს. საუბარია პროექტ კეთილი იყოს შენი მობრძანებაზე, რომლის ფარგლებში სოციალურად დაუცველ მშობლებს დაბადების მოწმობასთან ერთად, იუსტიციის სახლიდან სხვადასხვა ნივთსა და ფულად ვაუჩერს საჩუქრად ატანენ.

"იუსტიციის სახლი წუხილს გამოთქვამს, თუკი ვინმესთვის ჩვილის დაბადების ამ ფორმით მილოცვა, არსებული დემოგრაფიული მდგომარეობის გათვალისწინებით, დასაცინი გახდა. კიდევ უფრო სამწუხარო და სამარცხვინოა ეს პროცესი მაშინ, როდესაც საქმე ეხება სოციალურად დაუცველ ახალშობილებს, რომლებისთვისაც უკვე მეოთხე წელია, იუსტიციის სახლი გეფასთან ერთად გასცემს საჩუქრებს. დღემდე, მოქმედი პროექტით 15 000 პირმა უკვე ისარგებლა. გუშინ კი, იუსტიციის სახლმა სს გეფასთან განაახლა მემორანდუმი და პროექტი, რომელიც 2016 წლიდან დღემდე მხოლოდ სოციალურად დაუცველ ოჯახებში დაბადებული ახალშობილებისთვის იყო განკუთვნილი, საყოველთაო გახდა", — აცხადებენ უწყებაში.

მათივე თქმით, აღნიშნული ინფორმაცია სოციალურ ქსელში სხვადასხვა ინტერპრეტაციით გავრცელდა და ერთ-ერთი ტელეკომპანიის ხელმძღვანელმა და სხვა დაინტერესებულმა პირებმა პროექტის დისკრეტიდაცია სცადეს.

იუსტიციის სახლში განმარტავენ, რომ 25 ლარიანი ვაუჩერი სასაჩუქრე პაკეტთან ერთად ერთ-ერთი კომპონენტია და ის არის არა დახმარება, არამედ საჩუქარი კერძო სექტორისა და იუსტიციის სახლისგან იმ მშობლებისა და ბავშვებითვის, ვინც იუსტიციის სახლში დაბადების მოწმობის ასაღებად მივა.

მათივე ცნობით, პროექტი კეთილი იყოს შენი მობრძანება ახალშობილებს ორ განსხვავებულ პაკეტს სთავაზობს:

  • სოციალურად დაუცველ ოჯახებში დაბადებული ახალშობილების მშობლები, შვილის დაბადების მოწმობასთან ერთად, ჩვილის ტანისამოსისა და ჰიგიენური საშუალებების გარდა, ბავშვთა მოვლისა და კვების პროდუქტებზე 25-ლარიან ვაუჩერებს მიიღებენ;
  • ბავშვის საფენების, კვებისა და მოვლის ბრენდებზე კი, ერთი წლის განმავლობაში 30-40-პროცენტიანი ფასდაკლებით ისარგებლებენ.

იუსტიციის სამინისტრომ გუშინ, პირველ დეკემბერს გაავრცელა ინფორმაცია იმის შესახებ, რომ 15 დეკემბრიდან ახალშობილთა მშობლებს, რომლებიც იუსტიციის სამინისტროს შვილის დაბადების რეგისტრაციისთვის მიმართავენ, 25-ლარიანი სასაჩუქრე ვაუჩერი გადაეცემათ. როგორც სამინისტროში აცხადებენ, პროექტი კეთილი იყოს შენი მობრძანება, რომელიც დღემდე სოციალურად დაუცველი ოჯახებზე იყო განკუთვნილი, ახლა საყოველთაო ხდება.