შინაგან საქმეთა სამინისტროს ინფორმაციით, ქუთაისში კომპანია მისო ინტელექსპრესის გაქურდვის საქმეზე წარსულში ნასამართლევი ორი ადამიანი დააკავეს. უწყების ცნობით, მათ ბრალი სადგომში ან სხვა საცავში უკანონო შეღწევით ჯგუფურად ჩადენილ ქურდობაში ედებათ.

სამინისტროს ინფორმაციით, გამოძიებით დადგინდა, რომ ბრალდებულებმა 19 სექტემბერს ქუთაისში მდებარე ერთ-ერთი საცხოვრებელი კორპუსის სარდაფიდან იატაკი ამოჭრეს და კომპანიის საცავში შეაღწიეს. იქ ლითონის საცავის კარის გაჭრით კი, დაეუფლნენ თანხას და ოქროს ნივთებს.

უწყების განცხადებით, ჩატარებული ჩხრეკის შედეგად, ერთ-ერთი ბრალდებულის სახლიდან ნივთმტკიცებად ოქროს ნივთები და მოპარული ფულის ნაწილი ამოიღეს, ხოლო მეორე ბრალდებულის სახლიდან 2 შეკვრად დაფასოებული, 3 231 გრამი ნარკოტიკული საშუალება ჰეროინი, ნაქურდალი ფულისა და ოქროს ნივთების ნაწილი, ასევე დანაშაულის ჩადენის დროს გამოყენებული სამუშაო იარაღები. მას დამატებით განსაკუთრებით დიდი ოდენობით ნარკოტიკული საშუალების უკანონო შეძენა-შენახვასაც ედავებიან.

პირველი ბრალდებულის მიმართ გამოძიება საქართველოს სისხლის სამართლის კოდექსის 177-ე მუხლის მე-2 ნაწილის ბ ქვეპუნქტით, მე-3 ნაწილის ა ქვეპუნქტით და მე-4 ნაწილის ბ ქვეპუნქტით მიმდინარეობს, რაც წინასწარი შეთანხმებით საცავში უკანონო შეღწევით ჩადენილ ქურდობას გულისხმობს.

მეორე ბრალდებულის მიმართ კი გამოძიება ამ მუხლის გარდა, დამატებით ასევე, სსკ-ს 260-ე მუხლის მე-6 ნაწილის ა ქვეპუნქტით მიმდინარეობს, რაც განსაკუთრებით დიდი ოდენობით ნარკოტიკული საშუალების უკანონო შეძენა-შენახვას გულისხმობს.