რადიო თავისუფლების ევროპის ბიუროს მიერ მოპოვებული ინფორმაციის თანახმად, პირველად ისტორიაში, ევროკომისია გამოვა წინადადებით, რომ ევროკავშირმა უცხოელი აქტორებისთვის, რომლებიც დეზინფორმაციას ავრცელებენ, სანქციები დააწესოს. ამ აქტორებს შორის განიხილება რუსეთი და ჩინეთიც.

მედიის ცნობით, ევროკომისია აღნიშნულის შესახებ დოკუმენტს 2 დეკემბერს გაავრცელებს. იქ ნათქვამი იქნება, რომ 27-კაციანმა კომისიამ დეზინფორმაციის გამავრცელებელი აქტორების წინააღმდეგ ინსტრუმენტები უფრო სისტემურად უნდა გამოიყენოს და შესაბამისი პასუხისმგებლობა დააკისროს.

გარდა ამისა, რადიო თავისუფლების ინფორმაციით, ეს წინადადება უცხოელმა აქტორებმა "იარაღად" რომ არ გამოიყენონ, დოკუმენტში საუბარია დეზინფორმაციის კამპანიაში მესამე ქვეყნების ჩართულობის უშუალო მაგალითებზეც. კერძოდ, აქ ნათქვამია, რომ ეს ქვეყნები მონაწილეობდნენ კორონავირუსის წინააღმდეგ მიმართულ კამპანიაში, რომელიც ვრცელდებოდა არა მხოლოდ ევროკავშირზე, არამედ გლობალურად და სოციალური პოლარიზების, ასევე საკუთარი იმიჯის გაუმჯობესებისკენ იყო მიმართული.

დოკუმენტი აღნიშნავს იმასაც, რომ East StarCom-მის სამუშაო ჯგუფმა, რომელიც ევროპის საგარეო სამოქმედო სამსახურის (EEAS) დანაყოფია და რუსულ დეზინფორმაციას უწევს მონიტორინგს, წელს კრემლის სასარგებლო დეზინფორმაციის 500-ზე მეტი მაგალითი გამოავლინა და იგი უშუალოდ კორონავირსს ეხებოდა. ასევე, მათ გამოავლინეს 10 ათასზე მეტი პრორუსული დეზინფორმაცია 2015 წლიდან, ანუ მონიტორინგის დაწყებიდან დღემდე.

მედიის განცხადებითვე, ონლაინ პლატფორმებზე დეზინფორმაციის შემცირების მიზნით ევროკავშირი უფრო მკაცრი წესების შემოღებასაც განიხილავს.