ჯანდაცვის სამინისტროს შრომის ინსპექციაში აცხადებენ, რომ აკრძალული ეკონომიკური საქმიანობის გამო 2 ობიექტი დააჯარიმეს, 2 309-ს კი საქმიანობა შეუჩერეს. დეპარტამენტის ცნობით, ქვეყნის მასშტაბით, იმ დაწესებულებები შემოწმეს, რომლებიც საქართველოს მთავრობის 2020 წლის 23 მაისის N322-ე დადგენილებით აკრძალულ საქმიანობას ახორციელებდნენ.

"შემოწმების შედეგად დადგინდა, რომ ქ. ბათუმში შპს Online Magic, ე.წ. რეფორმერი ფიტნესი აკრძალულ ეკონომიკურ საქმიანობას ახორციელებდა, რომლის ადგილზე დაფიქსირების შემდეგ, დარღვევების შესაბამისად, იურიდიული პირი 10 000 ლარის ოდენობით დაჯარიმდა. თუმცა, მიუხედავად ამისა, სპორტული დარბაზი საქმიანობას კვლავ განაგრძობდა. შრომის ინსპექციამ განმეორებითი დარღვევის დაფიქსირების შესახებ ინფორმაცია შინაგან საქმეთა სამინისტროს მიაწოდა", — აცხადებენ შრომის ინსპექციის დეპარტამენტში.

მათივე ცნობით, N322-ე დადგენილებით დამტკიცებული იზოლაციისა და კარანტინის წესების მოთხოვნების განმეორებით დარღვევაზე პასუხისმგებლობა გათვალისწინებულია საქართველოს სისხლის სამართლის კოდექსის 248 მუხლის შესაბამისად.

ასევე, აკრძალული საქმიანობის გამო 10 000 ლარით დაჯარიმდა ბათუმში რესტორანი შპს დიანა — ე.წ. კიდობანი. დეპარტამენტის მტკიცებით, ობიექტი N322-ე დადგენილებით აკრძალულ ეკონომიკურ საქმიანობას ახორციელებდა.

გარდა ამისა, შრომის ინსპექციის მიერ თბილისში ღამის კლუბების შემოწმებაც განხორციელდა.

"შემოწმების შედეგად, დადგინდა, რომ 10 000 ლარით დაჯარიმებული ობიექტი შპს და ჰაუს რეკორდს აკრაძალულ ეკონომიკურ საქმიანობას კვლავ განაგრძობდა. აღნიშნულის შესახებ შრომის ინსპექციამ შემდგომი რეგირების მიზნით, შსს-ს დაუყოვნებლივ აცნობა", — აცხადებენ შრომის ინსპექციაში.

შრომის პირობების ინსპექტირების დეპარტამენტში აცხადებენ, რომ ბოლო ორი დღის განმავლობაში ინსპექციამ გაფრთხილება 2 738 ობიექტს მისცა. მათივე თქმით, შექმნილი ეპიდემიოლოგიური ვითარებიდან გამომდინარე, ქვეყნის მასშტაბით გამკაცრებულ კონტროლს განაგრძობენ.