სახელმწიფო უსაფრთხოების სამსახურის ანტიკორუფციული სააგენტოს ცნობით, თაღლითობისა და უკანონო შემოსავლის ჯგუფურად ლეგალიზაციის საქმეზე ოთხი პირი დააკავეს.

უწყების ინფორმაციით, ერთ-ერთი ბაგა-ბაღის დირექტორმა, ბაღის მოსაწყობად, მოქალაქესთან 170 400 ლარის ღირებულების, 12 თვიანი იჯარის ხელშეკრულება გააფორმა. სააგენტოს განცხადებით, მან ხელშეკრულების გაფორმების სანაცვლოდ, საწყის ეტაპზე ერთჯერადად 28 000 ლარის, ხოლო ყოველთვიურად 2 400 ლარის გადახდა მოითხოვა.

"დანაშაულებრივი გზით მოთხოვნილი თანხისთვის კანონიერი სახის მისაცემად, დანაშაულებრივი ჯგუფის წევრებმა მეიჯარეს გააფორმებინეს ფიქტიური სესხის ხელშეკრულება, რომლითაც სამართლებრივ ჩარჩოში მოექცა დანაშაულებრივი გზით გადასაცემი თანხის კანონიერება", — ვკითხულობთ განცხადებაში.

უწყების ცნობით, 2020 წლის 26 ნოემბერს მეიჯარემ მოქალაქეს თანხის ნაწილი — 16 400 ლარი გადასცა, რის შემდგომაც დანაშაულებრივი ჯგუფის წევრები დააკავეს. მათივე განცხადებით, დანაშაული ექვსიდან ცხრა წლამდე თავისუფლების აღკვეთას ითვალისწინებს.