თბილისის მერის კახა კალაძის განცხადებით, სოციალურად დაუცველი მოხუცებისთვის პროდუქტების შესაძენად მერიის სარეზერვო ფონდიდან ნახევარი მილიონი ლარი გამოიყოფა.

"პანდემიის პირველი ტალღა როცა გვქონდა, სწორედ ამ მიდგომებით ძალიან ბევრ ოჯახს დავეხმარეთ და ხელი შევუწყვეთ, რომ შეგვემსუბუქებინა მდგომარეობა. ანალოგიურად იქნება ეს პლატფორმა და მომდევნო დღეების განმავლობაში წინასაახალწლოდ უზრუნველვყოფთ საკვების მიტანას ამ მოხუცებისთვის", — განაცხადა კახა კალაძემ.

მისივე თქმით, შეიქმნება სპეციალური პლატფორმა, რათა სურვილის შემთხვევაში ამ წამოწყებაში მოქალაქეები და ბიზნესსექტორის წარმომადგენლები ჩაერთონ:

"მე მინდა მოვუწოდო გამგეობებს, ყველა თანამშრომელს, ვისაც არ აქვს ჯანმრთლობის პრობლემა, წესების სრული დაცვით დავიწყოთ ამ პროგრამის განხორციელება და მოვახდინოთ საკვები პროდუქტებით უზრუნველყოფა იმ ოჯახებისთვის და ადამიანებისთვის, ვისაც ყველაზე მეტად გაუჭირდა".

საკოორდინაციო საბჭომ 28 ნოემბრიდან 31 იანვრის პერიოდში არაერთი შეზღუდვა დააწესა. მათ შორის, გადაადგილებაზე, მუნიციპალურ და საქალაქთაშორისო ტრანსპორტზე, რესტორნებსა და ბაზრობებზე. 24 დეკემბრიდან 2 იანვრის პერიოდში ხდება შეზღუდვების ნაწილობრივი შემსუბუქება: კერძოდ, ქვეყნის მასშტაბით, იმუშავებენ სავაჭრო ცენტრები, ღია და დახურული ბაზრობები და აღდგება როგორც მუნიციპალური, ისე საქალაქთაშორისო ტრანსპორტის მუშაობა. 3 იანვრიდან 15 იანვრის პერიოდში აღდგება ყველა ის შეზღუდვა, რომელიც 24 დეკემბრამდე მოქმედებდა. ამ პერიოდში ცხადდება უქმე, დასვენების დღეები. ხოლო 16 იანვრიდან აღდგება მუნიციპალური და საქალაქთაშორისო ტრანსპორტის მუშაობა, სავაჭრო ობიექტებისა და ღია და დახურული ბაზრობების მუშაობა (გარდა შაბათ-კვირისა).

ამავე თემაზე: