დაავადებათა კონტროლის ცენტრის ხელმძღვანელი და საკოორდინაციო საბჭოს წევრი, ამირან გამყრელიძე აცხადებს, რომ სისტემას გარკვეული ნაკლოვანებები აქვს და ამას აღიარებს. თუმცა მისი თქმით, სისტემა ახლა უკეთაა მომზადებული, ვიდრე აქამდე იყო.

"როცა მეკითხებოდნენ, სისტემა მომზადებულია თუ არა, მე ყოველთვის ვამბობდი და ახლაც ვამბობ, რომ უკეთესად არის მომზადებული, მაგრამ არა იდეალურად. უკეთ, ვიდრე ყოფილა იმ დროს, როცა მე ჯანდაცვის სისტემაში ვმუშაობდი ან შემდეგ კიდევ", — განაცხადა მან ფორმულას ეთერში.

მანვე აღიშნა, რომ კრიტიკა აუცილებელია და მთავარია საქმის კეთება და ერთმანეთის გვერდში დგომა.

"იმდენი შემიძლია კრიტიკა გამოვთქვა და ვთქვა, რამდენი ნაკლი მაქვს მე თვითონ და იმ უწყებას, რომელსაც მე ვხელმძღვანელობ. რა თქმა უნდა, ნაკლის გარეშე არ შეიძლება არ იყო, მაგრამ მთავარია საქმის კეთება. რა თქმა უნდა, კრიტიკა აუცილებელია, მიგვითითეთ, გვითხარით, რას ვერ ვაკეთებთ და რა უნდა გავაკეთოთ უკეთესად. გვერდში დავუდგეთ ერთმანეთს", — განაცხადა მან ფორმულას ეთერში.

კორონავირუსის შემთხვევათა მატების გამო ოპოზიცია და სამოქალაქო საზოგადოება მთავრობასა და ჯანდაცვის სისტემას აკრიტიკებს. მათი თქმით, ხელისუფლებამ ვერ უზრუნველყო ეფექტური მენეჯმენტი და დაზიანდა, როგორც ქვეყნის ეკონომიკა, ასევე, ადამიანების ჯანმრთელობა, რაც ვირუსის ფართოდ გავრცელებამ გამოიწვია.