კლინიკა გული მედპერსონალის კორონავირუსით ინფიცირების გამო 10 დეკემბრამდე დაიკეტა.

კლინიკის დირექტორის, ანზორ მელიას განცხადებით, ბოლო ერთი კვირა ყველაზე მძიმე იყო, როცა იგებდნენ, რომ ან ექთანს აღარ შეეძლო დახმარების გაწევა ინფიცირების გამო, ან ექიმს.

"მიუხედავად გამკაცრებული ზომებისა, რომ არ შემოპარულიყო კოვიდვირუსიანი, მაინც უძლური აღმოვჩნდით იმიტომ, რომ ბევრი შემთხვევა იყო ავადმყოფებით დაინფიცირების. რომ არ მიგვეღო ეს პაციენტები, არ შეიძლებოდა. ზოგი მალავდა, რომ სახლში სიცხე ჰქონდათ, რენტგენს რომ გადავუღებდით და ფილტვების ანთება დადასტურდებოდა, ვაკეთებდით ტესტს კოვიდზე, მოდიოდა დადებითი, მერე 2-3 დღე ვერ გადაგვყავდა. მერე ემატებოდა პაციენტები და დაინფიცირდა 70 პროცენტზე მეტი", — განაცხადა ანზორ მელიამ.

ამ ეტაპზე კლინიკა გულის 30 ექიმი და 40 ექთანია კორონავირუსით ინფიცირებული. ანზორ მელიას განცხადებით, ინფიცირებული არიან სხვა თანამშრომლებიც. მისივე თქმით, კლინიკაში ერთი კვირით ადრე ეტაპობრივად დაიხურა რეანიმაცია, ინტენსიური, ემერჯენსი და დიაგნოსტიკა.

"პაციენტების ნაწილი გავწერეთ, ნაწილი, ვინც კოვიდინფიცირებული იყო, შესაბამის კლინიკებში გადავიყვანეთ, დარჩენილ ქრონიკულ პაციენტებთან სატელეფონო კონტაქტზე ვართ და დისტანციურად ვმკურნალობთ. ჩვენი კლინიკა ვერ გადაკეთდება კოვიდკლინიკად, რადგან ძალიან ბევრი პაციენტია გულის დაავადებით და თუ ვერ დავეხმარებით, უბრალოდ, დაიღუპებიან, ამიტომ, საჭიროა, რომ იყოს მონოპროფილური კლინიკებიც", — აღნიშნა ანზორ მელიამ.

26 ნოემბრის მონაცემებით, საქართველოში კორონავირუსის კიდევ 3 801 ახალი შემთხვევა გამოვლინდა. ამასთან, გარდაიცვალა 39 ადამიანი. 3 200 პაციენტი გამოჯანმრთელდა.

პანდემიის დაწყების დღიდან სულ ქვეყანაში 118 690 შემთხვევა დადასტურდა, აქედან 98 781 ადამიანი უკვე გამოჯანმრთელდა, ხოლო 1 124 — გარდაიცვალა.