თბილისის სატრასპორტო კომპანიაში აცხადებენ, რომ კორონავირუსით მეტროს მემანქანეთა 20-მდე თანამშრომელი არის ინფიცირებული. კომპანიის პრესსამსახურში On.ge-ს უთხრეს, რომ ისინი შესაბამის მკურნალობას გადიან და რომ მეტროს მუშაობას საფრთხე არ ემუქრება.

"ინფიცირებულია 20-მდე მემანქანე, მეტროს მუშაობა არ შეჩერდება. ასევე, გვყავს სარეზერვო თანამშრომლებიც და მეტროს შეუძლია სრული დატვირთვით მუშაობა უზრუნველყოს. არანირი კოლაფსი გვემუქრება", — ამბობს სატრანსპორტო კომპანიის პრესსამსახურის წარმომადგენელი.

თბილისის სატრანსპორტო კომპანიის დამოუკიდებელი პროფესიული კავშირის, ერთობა 2013-ის ინფორმაციით, მეტროს მემანქანეების და სხვა პოზიციებზე დასაქმებული თანამშრომლების დიდი ნაწილი ინფიცირებულია.

ისინი შექმნილ ვითარებაზე სრულ პასუხისმგებლობას სატრანსპორტო კომპანიის გენერალურ დირექტორსა და მენეჯმენტს აკისრებენ, რადგან, ამობენ, რომ ვირუსთან პრევენციასთან დაკავშირებული პრევენციული ღონისძიებები კომპანიამ არ გაითვალისწინა.

25 ნოემბრის მონაცემებით, საქართველოში კორონავირუსის 3 071 ახალი შემთხვევა დადასტურდა, გამოჯანმრთელდა — 3 366 ადამიანი, გარდაიცვალა — 34.

ქვეყანაში პანდემიის გავრცელებიდან დღემდე გამოვლენილი დადასტურებული შემთხვევების საერთო რაოდენობა შეადგენს 114 889-ს. ჯამში გამოჯანმრთელებულთა რაოდენობა გაიზარდა 95 581-მდე. 2020 წლის 26 თებერვლიდან დღემდე სულ გვაქვს 1 085 გარდაცვალების შემთხვევა.