ჯანდაცვის მინისტრის, ეკატერინე ტიკარაძის განცხადებით, იმ შემთხვევაში, თუ კორონავირუსით ინფიცირებული პაციენტი კლინიკაში დარეკავს და კლინიკა მას არ მიიღებს, პაციენტს შეუძლია, 15 05-ზე დარეკოს და მოხდება შესაბამისი რეაგირება.

"ზარი იწერება და შესაბამისად, მოხდება დროული რეაგირება როგორც რეგულირების სააგენტოსგან, ასევე, ჯანმრთელობის ეროვნული სააგენტოს მხრიდან. ჩვენ ნამდვილად უზრუნველვყოფთ ყველა პაციენტის უსაფრთხოებას და განთავსებას საჭირო ლოკაციაზე. არავის აქვს უფლება პაციენტი დატოვოს კლინიკის გარეთ", — განაცხადა ეკატერინე ტიკარაძემ.

რამდენიმე დღის წინ ბოჭორიშვილის კლინიკის გენერალურმა დირექტორმა, დავით გადელიამ განაცხადა, მიღებულია, რომ ჰოსპიტალურ სექტორში მკურნალობას ინფიცირებულების 15-20% გადიოდეს, ახლა კი ეს რიცხვი 37%-მდეა. მისი აზრით, ამას ვერ გაუძლებს ვერც ერთი ქვეყანა. ამის შესახებ მან პრემიერმინისტრ გიორგი გახარიასა და კლინიკურ ჯგუფს შორის გამართული შეხვედრის შემდეგ განაცხადა.

"ძალიან გვინდა ეს რაოდენობა ისე გადანაწილდეს, რომ რაც შეიძლება მეტმა შედარებით მსუბუქმა პაციენტმა იმკურნალოს სახლის, ან კიდევ უკეთესი — კოვიდ-სასტუმროს პირობებში, რისი საშუალებაც ჩვენ გვაქვს და ეს მართლა საქართველოში არის ასე, რომ ადამიანებს აქვთ საშუალება იმკურნალონ კოვიდ-სასტუმროებში, სადაც არის ელემენტარული თერაპიული მეთვალყურეობის საშუალება", — განაცხადა გადელიამ.

მისივე თქმით, მნიშვნელოვანია, რაც შეიძლება მეტმა შედარებით მსუბუქმა პაციენტმა იმკურნალოს სახლის, ან კოვიდსასტუმროს პირობებში.

24 ნოემბერს საქართველოში კორონავირუსის 3 128 ახალი შემთხვევა დადასტურდა, გამოჯანმრთელდა — 3 045, გარდაიცვალა —39.

ქვეყანაში პანდემიის გავრცელებიდან დღემდე გამოვლენილი დადასტურებული შემთხვევების საერთო რაოდენობა შეადგენს 111 818-ს. ჯამში გამოჯანმრთელებულთა რაოდენობა გაიზარდა 92 215-მდე. 2020 წლის 26 თებერვლიდან დღემდე სულ გვაქვს 1 051 გარდაცვალების შემთხვევა.

ინფიცირების აქტიური შემთხვევაა 18 526. მათ შორის, 6 192 ადამიანი მკურნალობს საავადმყოფოში.