ნაციონალური მოძრაობის ერთ-ერთმა ლიდერმა, ნიკა მელიამ განაცხადა, რომ დარწმუნებულია, ჯანდაცვის მინისტრს, ეკატერინე ტიკარაძეს უახლოეს პერიოდში თანამდებობიდან მოხსნიან. აღნიშნული ნიკა მელიამ TV პირველის ეთერში განაცხადა.

"ქვეყანას ჰყავს არაფორმალური მმართველი, რომელიც არის არაკონსტიტუციური. ამას გვეუბნება, რომ მიიღეთ ეს რეალობა, არ მიიღებთ და თქვენს თავს დააბრალეთო, მაგრამ ჩვენს თავს კი არ დავაბრალებთ, ამ ადამიანს ვებრძვით, როგორც ოლიგარქს, როგორც ანტისახელმწიფოებრივ ელემენტს, რომელსაც არაფერი საერთო არ გააჩნია სახელმწიფოებრიობასთან და არ მიკვირს ქალბატონი ტიკარაძეზე, დარწმუნებული ვარ, რომ უახლოეს პერიოდში ამ ქალბატონს მოხსნიან. ვინმეს გგონიათ, რომ ამით რაღაცა შვება მოუვა? თავიდან ბოლომდე ამ ქალბატონის ბრალი არის 2%. იმ კაბინეტში რომ არსებობს, ეს არის მისი დანაშაული, დანარჩენი არის კაბინეტი და იქ რაღაცა კორონას საბჭო რომ შეიქმნა, რომ დასხდებოდნენ ხოლმე დილაობით, რომ კადრებს ააღებინებდნენ ჟურნალისტებს, იმ საბჭომ რა გააკეთა?", — განაცხადა ნაციონალური მოძრაობის ერთ-ერთმა ლიდერმა.

23 ნოემბერს პირველი საუნივერსიტეტო კლინიკის დირექტორმა, ლევან რატიანმა ფორმულას ეთერში განაცხადა, რომ ყველამ უნდა დაივიწყოს ამბიცია და ვისაც არ შეუძლია სახლში წავიდეს. პოლიტიკის ფორმულის წამყვანმა, სოფო ზურაბიანმა მას რამდენჯერმე ჰკითხა, ხომ არ გულისხმობდა ის ჯანდაცვის მინისტრ, ეკატერინე ტიკარაძეს, თუმცა რატიანმა ამ კითხვას პირდაპირ არ უპასუხა.

ეკატერინე ტიკარაძემ დღეს, საკოორდინაციო საბჭოს სხდომის შემდეგ გამართულ ბრიფინგზე განაცხადა, რომ თავდაჯერებულობა და ქედმაღლობა არ სჩვევია, ამიტომ გამორიცხავს, რომ რატიანი მას გულისხმობდა და თანამდებობის დატოვებას არ აპირებს.