თბილისის მერის, კახა კალაძის, განცხადებით, ოპოზიციის წარმომადგენლების მიერ გავრცელებული ინფორმაცია თბილისის ბიუჯეტში ბიუროკრატიული ხარჯების ზრდის შესახებ სიმართლეს არ შეესაბამება.

"ჩემი თხოვნაა, ბიუჯეტზე ნაადრევად არ ვიმსჯელოთ. როგორც ყოველ წელს, ჯერ ხდება პირველადი ბიუჯეტის წარდგენა, რომელიც შემდეგ დაკორექტირდება. მოგვიანებით გახდება ცნობილი ბიუჯეტის საბოლოო ვერსია, რომელიც, დარწმუნებული ვარ, იმაზე მეტი იქნება, ვიდრე დღეს არის წარმოდგენილი. ჩვენ მოგვეცემა იმის შესაძლებლობა, რომ ის პროექტები, რაზეც პანდემიამდე ვსაუბრობდით, განხორციელდეს ინფრასტრუქტურის, ასევე, სოციალური და ჯანდაცვის მიმართულებით", — განაცხადა მერმა.

23 ნოემბერს, ნაციონალური მოძრაობის პოლიტიკური საბჭოს წევრმა, ლევან ხაბეიშვილმა განაცხადა, რომ ბიუროკრატიული ხარჯები იზრდება, თბილისის ბიუჯეტს კი თანხა აკლდება.