ჯანდაცვის მსოფლიო ორგანიზაციამ COVID-19-ის მკურნალობისთვის პრეპარატების სია განაახლა. ორგანიზაცია არ უწევს რეკომენდაციას ანტივირუსული პრეპარატის, რემდესივირის გამოყენებას, მიუხედავად იმისა, რამდენად მძიმედ არის პაციენტი.

კოვიდპაციენტების სამკურნალოდ რემდესივირს გამოიყენებაზე საუბრობდნენ საქართველოშიც. ინფექციური საავადმყოფოს დირექტორმა და კლინიკური ჯგუფის ხელმძღვანელმა, თენგიზ ცერცვაძემ განაცხადა, რომ პრეპარატს მხოლოდ მძიმე პაციენტების შემთხვევაში გამოიყენებდნენ. გარდა ამისა, ინფექციური საავადმყოფოს ინფორმაციით, თენგიზ ცერცვაძეს, რომელსაც კორონავირუსი დაუდასტურდა რემდესივირი გადაესხა.

განახლებული ინფორმაციის თანახმად, რომელიც BMJ-ის სამედიცინო ჟურნალში გამოქვეყნდა, მიმდინარე მონაცემები არ მიანიშნებს იმაზე, რომ რემდესივირს რაიმე გავლენა აქვს კორონავირუსით გარდაცვალების რისკზე ან ხელოვნური ვენტილაციის საჭიროებაზე.

დაახლოებით ერთი თვის წინ რემდესივირის მწარმოებელმა კომპანია გილეადმა განაცხადა, რომ აშშ-ს წამლებისა და საკვების ადმინისტრაციამ (FDA) კორონავირუსის სამკურნალოდ ანტივირუსული პრეპარატი დაამტკიცა. რემდესივირი გახდა პირველი პრეპარატი, რომელიც FDA-მ კოვიდის წინააღმდეგ გამოყენებისთვის დაამტკიცა.

როგორც CNN-ს ჯონ ჰოპკინსის ცენტრის უფროსმა მეცნიერმა, ამეშ ადალიამ უთხრა, რემდესივირმა ჯანმოს დადებითი შეფასება ახალი კვლეების გამო ვერ მიიღო.

"ხალხი ხვდებოდა, რომ რემდესივირის სარგებელი, საუკეთესო შემთხვევაში, მინიმალურია და ერთადერთი სარგებელი ისაა, რომ სავარაუდოდ, პაციენტებს უფრო სწრაფ განკურნებაში ეხმარებოდა, თუმცა მტკიცებულებები ამის შესახებაც სუსტია", — განაცხადა მან.

როგორც იგი განმარტავს, ანტივირუსული პრეპარატის გამოყენებას იმანაც შეუწყო ხელი, რომ რამდენიმე კვლევაში, თუმცა არა ყველაში, მან დადებითი შედეგი აჩვენა.

"ჩვენ ბევრი მედიკამენტი გვაქვს, რომელიც FDA-ს მიერ არის დამტკიცებული, მაგრამ ისინი ყოველთვის შედიან რეკომენდაციებში ან გაიდლაინდებში? არა, ყველა მათგანი არა. რემდესივირი გავრცელებული პრეპარატი იქნება? სავარაუდოდ, უკვე აღარ", — განაცხადა ადალიამ.

ჯანდაცვის მსოფლიო ორგანიზაციამ კვლევისთვისა და ანალიზისთვის საერთაშორისო პანელი შექმნა, რომელშიც 24 ექსპერტი და კრონავირუსისგან განკურნებული 4 ადამიანი შედიოდა. რემდესივირის გამოყენების საწინააღმდეგო რეკომენდაცია ეფუძნება 4 კვლევას, რომელშიც კოვიდის შედეგად ჰოსპიტალიზირებული 7 333 პაციენტი მონაწილეობდა.

"რემდესივირის ნებისმიერი დადებითი ეფექტი, თუ ისინი ნამდვილად არსებობს, სავარაუდოდ, მცირეა და სერიოზული ზიანის შესაძლებლობას ტოვებს", — ნათქვამია გაიდლაინში.

ჯანმოს გადაწყვეტილებას გამოეხმაურა კომპანია გილეადიც. მათი განცხადებით, ანტივირუსილი პრეპარატის გამოყენება სხვა ქვეყნებისა და ორგანიზაციების მიერ რეკომენდებული იყო სანდო მონაცემებზე დაყრდნობით. გილეადი იმედგაცრუებულია იმის, გამო ჯანდაცვის მსოფლიო ორგანიზაციამ არ გაითვალისწინა ეს რეკომენდაციები იმ დროს, როცა შემთხვევების რაოდენობა მსოფლიოში მკვეთრად იზრდება.