ამერიკის შეერთებული შტატების ელჩმა საქართველოში, კელი დეგნანმა აშშ-ს სახელმწიფო მდივნის, მაიკ პომპეოს ვიზიტის შეჯამებისას განაცხადა, რომ ეკლესიას კვლავ სასიცოცხლო როლი აქვს საქართველოს კულტურისა და ტრადიციების დაცვაში.

"საქართველოს მართლმადიდებელი ეკლესია კვლავ, ისევე როგორც აქამდე წლების განმავლობაში, სასიცოცხლო როლს თამაშობს საქართველოს უნიკალური კულტურისა და ტრადიციების დაცვაში. მის უწმინდესობასთან შეხვედრისას სახელმწიფო მდივანმა, პომპეომ ისაუბრა საქართველოს როლზე რელიგიური თავისუფლების საერთაშორისო ალიანსში. ხაზი გაუსვა რელიგიური თავისუფლების დაცვისა და ხელშეწყობის მნიშვნელობას, რათა ყველას შეეძლოს თავისუფლად მისდიოს მის რწმენასა და რელიგიას", — ამბობს დეგნანი.

კელი დეგნანის თქმით, სახელმწიფო მდივანმა, ასევე, დარწმუნებით აღნიშნა, რომ აშშ-საქართველოს ურთიერთობა მტკიცედ ეფუძნება საერთო ღირებულებებსა და შეერთებული შტატების ურყევ ერთგულებას საქართველოს ტერიტორიული მთლიანობისა და სუვერენიტეტის მიმართ.

პომპეო თბილისში 17 ნოემბერს საღამოს ჩამოფრინდა და ოფიციალური შეხვედრები გუშინ, 18 ნოემბერს ჰქონდა.

აშშ-ის სახელმწიფო მდივანი შეხვდა პრეზიდენტ სალომე ზურაბიშვილს, პრემიერმინისტრ გიორგი გახარიასა და პატრიარქ ილია მეორეს, თუმცა მედიასთან კომენტარები არ გაუკეთებია და მხოლოდ აშშ-ის საელჩოს განცხადებები გავრცელდა. ასევე, პომპეო შეხვდა არასამთავრობო ორგანიზაციებს. ცნობილია, რომ NGO-ებთან საუბრის ძირითადი თემა სასამართლოს დამოუკიდებლობა იყო.

შეხვედრა არ გამართულა ოპოზიციასთან. რამდენიმე პარტიის წარმომადგენლები სახელმწიფო მდივანს მდუმარე აქციით დახვდნენ. ვიზიტის დასრულების შემდეგ პომპეომ თავისი წარმომადგენელი დატოვა, რომელიც ოპოზიციის წევრებს შეხვდა.

გაიგეთ მეტი პომპეოს ვიზიტზე: