ოპოზიციური პარტიების განცხადებით, საქართველოს დემოკრატიზაციის ახალ ეტაპზე გადასვლას საფრთხეს უქმნის ბიძინა ივანიშვილი, რომელიც, მათივე თქმით, იტაცებს სახელმწიფო ძალაუფლებასა და არღვევს ქვეყნის დემოკრატიულ ინსტიტუტებს. აშშ-ის სახელმწიფო მდივნის, მაიკ პომპეოს საქართველოში ვიზიტთან დაკავშირებით გავრცელებულ განცხადებას განცხადებას ხელს 23 პარტია აწერს.

"არჩევნების გაყალბება, სასამართლოს პოლიტიზაცია და პოლიტპატიმრები, პოლიტიკური ოპონენტების დევნა, დასავლური ინვესტიციებისთვის ხელის შეშლა და სტრატეგიული მნიშვნელობის საერთაშორისო პორტის ანაკლიის მშენებლობაზე უარის თქმა — ეს ის ნიშნებია, რაც სწორედ საქართველოს დემოკრატიულ უკუსვლაზე მიუთითებს [...] თავისუფალმა სამყარომ ფხიზლად უნდა მიადევნოს თვალი დემოკრატიული უკუსვლის ამ ნიშნებს საქართველოში", — ვკითხულობთ განცხადებაში.

განცხადებაში ხაზგასმითაა აღნიშნული ანაკლიის ღრმაწყლოვანი პორტის გეოპოლიტიკური მნიშვნელობა და ნათქვამია, რომ მაშინ, როცა ივანიშვილის რეჟიმი "აკრძალული მეთოდებით იბრძვის თავისუფალი ბაზრის წინააღმდეგ", დასავლეთის მოკავშირე ჯგუფებს უნდა ჰქონდეთ მეტი მხარდაჭერა თავისუფალი ვაჭრობის ხელშეკრულებისა და ამერიკული ინვესტიციების სახით.

"ტოტალიტარული და ავტორიტარული რეჟიმების თავისუფალ სამყაროსთან დაპირისპირებაში, დემოკრატიასთან ერთად საკვანძო მნიშვნელობისაა ეკონომიკური თავისუფლების მოპოვება", — ვკითხულობთ ოპოზიციური პარტიების განცხადებაში.

განცხადებაში ნათქვამია, რომ მაიკ პომპეო საქართველოში ჩამოვიდა რეგიონში მნიშვნელოვანი საფრთხეებისა და ახალი შესაძლებლობების გამოჩენის პარალელურად, რაც, მათივე თქმით, ხაზს უსვამს აშშ-ს მხარდაჭერას პარტნიორი ქვეყნების თავისუფლებისა და სუვერენიტეტის მიმართ.

"პოლიტიკური გარღვევისთვის ახლა საჭიროა უსაფრთხოების სფეროში დინამიკის ჩვენება, რაც აშშ-საქართველოს ორმხრივი თანამშრომლობის ახალ ეტაპზე გადაყვანას გულისხმობს, როგორიცაა ამერიკული სამხედრო ინფრასტრუქტურის საქართველოში განთავსება და NATO-ში გაწევრიანების გზაზე შემდგომ ეტაპზე გადასვლა", — ვკითხულობთ განცხადებაში.

განცხადებას ხელს 23 ოპოზიციური პარტია აწერს:

  • ევროპული საქართველო
  • სტრატეგია აღმაშენებელი
  • ახალი პოლიტიკური ცენტრი გირჩი
  • მოძრაობა ლელო საქართველოსთვის
  • ერთიანი ნაციონალური მოძრაობა
  • ლეიბორისტული პარტია
  • მოქალაქე
  • თავისუფალი დემოკრატები
  • ახალი საქართველო
  • რესპუბლიკური პარტია
  • ეროვნულ დემოკრატიული პარტია
  • ევროპული დემოკრატები
  • ქრისტიან კონსერვატიული პარტია
  • მოძრაობა სახელმწიფო ხალხისათვის
  • ემსახურე საქართველოს
  • სამართლიანობისთვის
  • სამოქალაქო ალიანსი თავისუფლებისათვის
  • თავისუფლება
  • ქრისტიან დემოკრატიული მოძრაობა
  • ახალი ქრისტიან დემოკრატები
  • კანონი და სამართალი
  • გამარჯვებული საქართველო
  • თავისუფალი საქართველო