TV პირველი ჟურნალისტებმა, თეონა ბაკურიძემ, თამარ ჩიხლაძემ და პროდიუსერმა, ნათია ზოიძემ ტელეკომპანია დატოვეს. ამის შესახებ ინფორმაცია On.ge-ს TV პირველის დამფუძნებელმა და დირექტორმა ვატო წერეთელმა დაუდასტურა.

როგორც On.ge-სთან საუბარში თეონა ბაკურიძე აღნიშნავს, რომ გადაწყვეტილება სარედაქციო პოლიტიკას არ უკავშირდება.

"არ უკავშირდება სარედაქციო დამოუკიდებლობის საკითხს, ამოიწურა ჩემი მხრიდან თანამშრომლობის რესურსი და მადლობა TV პირველს დიდი შესაძლებლობისთვის", — განაცხადა თეონა ბაკურიძემ.

ნათია ზოიძემ აჭარის ტელევიზიის დირექტორის მოადგილის პოსტი თებერვალში დატოვა. ამის შესახებ ზოიძემ საკუთარ ფეისბუქზე დაწერა. როგორც ზოიძემ განაცხადა, აჭარის მაუწყებლის დირექტორმა, გიორგი კოხრეიძემ დააკმაყოფილა მისი თხოვნა სამსახურიდან წასვლის შესახებ, თუმცა "ვერ იტყვის", რომ ეს ნებაყოფლობითი პროცესია.

ზოიძის განმარტებით, იძულებული იყო, რომ მაუწყებლიდან წასვლის გადაწყვეტილება მიეღო, რადგან ხელშეკრულება "საქმის კეთების საშუალებას აღარ იძლეოდა".

"ჩემი გადაწყვეტილებით აღფრთოვანებული არ ვარ, მაგრამ ეს გარდაუვალი იყო: ვერ ავიღებ პასუხისმგებლობას იმაზე, რისთვისაც არაფრის გაკეთების საშუალებას არ მაძლევენ; კოხრეიძე არასასურველ თანამშრომლებს რეორგანიზაციის გზით მაინც ჩამოიცილებს, დაასუსტებს არხის სარედაქციო პოლიტიკას", — დაწერა ზოიძემ.

ნათია ზოიძის თქმით, ის სამუშაოდ TV პირველში გადავიდა.

წამოსვლამდე ნათია ზოიძემ გიორგი კოხრეიძის წინააღმდეგ პროკურატურას მიმართა. ზოიძე მიიჩნევდა, რომ გიორგი კოხრეიძის ქმედებებში, შესაძლოა, იკვეთებოდეს სისხლის სამართლის კოდექსით გათვალისწინებული დანაშაულის ნიშნები.

გიორგი კოხრეიძე აცხადებდა, რო მას აქვს ნათია ზოიძის სატელეფონო კომუნიკაციის ჩანაწერები, რომელსაც გაასაჯაროებს, თუ მისი პირობები არ იქნება მიღებული. ამასთან, ტელევიზიის დირექტორი მის მოადგილეს სისხლის სამართლის დანაშაულის ჩადენაში ადანაშაულებდა.

აჭარის ტელევიზიაში დირექტორის, ნათია კაპანაძის გადაყენების შემდეგ მოსალოდნელ საფრთხეებზე საუბრობდნენ. ტელევიზიების თანამშრომლებს მიაჩნდათ, რომ ხელისუფლება მათზე გავლენის მოპოვებას ცდილობდა. დირექტორის გადაყენებიდან რვა თვის განმავლობაში კონკურსი სამჯერ ჩაიშალა, მეოთხე ცდაზე კი მმართველი პარტიისგან დაკომპლექტებულმა საბჭომ გიორგი კოხრეიძე აირჩია, რომლის მიმართაც თანამშრომლებს კითხვები ჰქონდათ.

აჭარის ტელევიზიის თანამშრომლების ნაწილი ჯერ კიდევ კენჭისყრამდე ამბობდა, რომ კოხრეიძის არჩევით სარედაქციო დამოუკიდებლობას საფრთხე შეექმნებოდა. კოხრეიძემ დანიშვნის დღესვე არხის მთავარ საინფორმაციო გამოშვებაში სტუმრობისას განაცხდა, რომ ჟურნალისტებს კრიტიკულ ტონს უწუნებდა. ამავე ეთერში მან უყვირა წამყვანს, თეონა ბაკურიძეს, რაც იმით განმარტა, რომ ჟურნალისტი მის კითხვებს არ პასუხობდა. საუბრის გაგრძელების შემდეგ კი მან აჭარის მთავრობის თავმჯდომარე თორნიკე რიჟვაძე გაამართლა, რომელმაც ბაკურიძეს ეთერში "დაოკებისკენ" მოუწოდა. კოხრეიძის თქმით, ამ რეპლიკამდე რიჟვაძე წამყვანმა მიიყვანა.

6 მარტს დროებით უფლებამოსილება შეუჩერეს ჟურნალისტ თეონა ბაკურიძეს. დირექტორის შესაბამის ბრძანებაში აღნიშნული იყო, რომ ტელეწამყვანი საინფორმაციო სამსახურის ახალ უფროსზე "ახდენდა ფსიქოლოგიურ ზეწოლას და აიძულებდა აბაზაძეს განცხადების საფუძველზე დაეტოვებინა მისი პოზიცია".

13 მარტს კი ბაკურიძე დირექტორმა სამსახურიდან გაათავისუფლა და მიზეზად შინაგანაწესის უხეში დარღვევა დაასახელა. ჟურნალისტი მიიჩნევდა, რომ მენეჯმენტის ეს გადაწყვეტილება უსამართლოა და ამ თემაზე დავის გაგრძელებას აპირებდა. სასამართლოში თეონა ბაკურიძის და აჭარის ტელევიზიის სხვა ჟურნალისტების უფლებებს EMC დაიცავს.

აჭარის ტელევიზიიდან გათავისუფლების შემდეგ თეონა ბაკურიძე სამუშაოდ TV პირველზე გადავიდა.

კოხრეიძის არჩევის შემდეგ აჭარის ტელევიზია დატოვეს მაუწყებლის კონსულტატმა ზვიად ქორიძემ და მედიამენეჯერმა, მარინა ვაშაყმაძემ.