დაავადებათა კონტროლის ეროვნული ცენტრის ხელმძღვანელის, ამირან გამყრელიძის განცხადებით, გრიპის ვირუსის აცრაზე მიმართვიანობა ორსულებში ძალიან მცირეა. გამყრელიძის თქმით, სასურველია, რომ ისინი მთელი სეზონის განმავლობაში იყვნენ აცრილები.

"მომართვიანობა სულ რაღაც 1 500-ის ფარგლებშია და რამდენჯერმე გავიმეორე, გრიპის ვირუსს განსაკუთრებული ტროპიზმი აქვს ორსული ქალებისთვის, ამიტომ სასურველია, რომ ორსული ქალები, მთელი ამ სეზონის განმავლობაში, მოყოლებული დღეიდან, მარტის ჩათვლით, აცრილნი იყვნენ. მათთვის იქნება, საკმარისი დოზა გრიპის ვაქცინისა", — განაცხადა გამყრელიძემ.

მისივე თქმით, ქვეყანაში გრიპის ვირუსის ცირკულაცია ჯერ არ დაფიქსირებულა, თუმცა დაახლოებით, მომდევნო 2 კვირაში იგი უკვე იქნება. იგი მოუწოდებს მოქალაქეებს, რომ იმუნიტეტის დროულად გამომუშავების მიზნით, კლინიკებს მიმართონ და აიცრან.