საქართველოში შეიქმნა ახალი პორტალი, რომელიც მოქალაეებს მისცემს საშუალებას გაიგონ ვინ არის მათი ოჯახის ექიმი და რომელ კლინიკაზე არიან მიმაგრებულები. ამის შესახებ საკოორდინაციო საბჭოზე ჯანდაცვის მინისტრმა ეკატერინე ტიკარაძემ განაცხადა.

"შეიქმნა ახალი პორტალი, რომელიც ჩვენს თანამოქალაქეებს მისცემს საშუალებას რომ თავიანთი ოჯახის ექიმი იპოვონ თუ ამ მომენტისთვის არ არის ცნობილი, ამ პორტალის საშუალებით ყველა ჩვენს მოქალაქეს პირადი ნომრის მითითებით მიეცემა ინფორმაცია თუ რომელ პირველადი ჯანდაცვის ცენტრზე არიან მიბმულები და ასევე საკუთარი ექიმის სახელი და გვარი", — განაცხადა ტიკარაძემ.

ჯანდაცვის მინისტრის თქმით, ეს პორტალი მნიშვნელოვნად განტვირთავს 112-ში მიმართლ ზარებს და ვისაც უკიდურესად ესაჭიროებათ სასწრაფო დახმარება, მათთვის უფრო სწრაფი გახდება.

ჯანდაცვის სამინისტროს ინფორმაციით, თუ მოქალაქე სარგებლობს საყოველთაო ჯანდაცვის პროგრამით, უნდა მიმართოს ოჯახის ექიმს, ან იმ სამედიცინო დაწესებულებას, სადაც რეგისტრირებულია ხოლო თუ მოქალაქე სარგებლობს კერძო დაზღვევით უნდა დაუკავშირდეს სადაზღვეო კომპანიის ოჯახის ექიმს. მოქალაქე რომელიც არ არის საყოველთაო ჯანდაცვის პროგრამის ბენეფიციარი და არც კერძო დაზღვევით სარგებლობს, ან არის საყოველთაო ჯანდაცვის პროგრამის ბენეფიციარი, მაგრამ არცერთ სამედიცინო დაწესებულებაში არ არის დარეგისტრირებული, უნდა დაუკავშირდეს ჯანდაცვის სამინისტროს ცხელ ხაზს: 1505 საინფორმაციო პორტალის ამოქმედების მიზანი, 112-ში განხორციელებული ზარების შემცირება და სამედიცინო მომსახურების ხარისხის გაუმჯობესებაა.

ოჯახის ექიმის/სამედიცინო დაწესებულების საკონტაქტო ინფორმაციის მისაღებად, ეწვიეთ საინფორმაციო პორტალს: http://ambulatoria.moh.gov.ge/ ან დაუკავშირდით ჯანდაცვის სამინისტროს ცხელ ხაზს: 1505.