"ოპერაცია ვაჟა შეშა სირაძე" — ასე უწოდა მოძრაობა სირცხვილიამ ექსპერიმენტს, რომელიც შინაგან საქმეთა სამინისტროს შესამოწმებლად ჩაატარა. აქტივისტების თქმით, დადასტურდა, რომ უწყება მათ უსმენს.

#სირცხვილიამ გაავრცელა ვიდეო, სადაც ასახულია, როგორც ექსპერიმენტის დაგეგმვა, ასევე, პოლიციის რეაგირება. კადრებში ჩანს, რომ აქტივისტები სახლში განიხილავენ, როგორ განახორციელონ გეგმა, შემდეგ კი მეგობრებს ურეკავენ და ეუბნებიან, თითქოს პარლამენტთან შეშის მიტანა სურთ. ისინი მუყაოს ქაღალდებსა და ბალიშებზე წერენ შეშას და პარლამენტის წინ პარკებით მიდიან.

ფოტო: კადრები ვიდეოდან / სირცხვილია

კადრებში ჩანს, რომ პარლამენტთან მათ სამართალდამცავები ხვდებიან. ორი პოლიციელი აქტივისტებს შენობის გვერდითა შესასვლელიდან მიყვება, სხვები კი რუსთაველზე ხვდებიან. ამავე კადრებში ჩანს, რომ მათი რიცხვი იზრდება და რამდენიმე სხვადასხვა ქვედანაყოფი მიდის.

ფოტო: კადრები ვიდეოდან / სირცხვილია

საბოლოოდ, ერთ-ერთი სამართალდამცავი აქტივისტებთან მიდის იმის გასარკვევად, რა მიიტანეს და რას აკეთებენ, რა დროსაც მას მუყაოს ყუთებს აწვდიან, რომელსაც შეშა აწერია. აქტივისტები პოლიციელებს ეუბნებიან, რომ მათი საქციელი ადასტურებს, რომ უსმენენ.

"ექსპერიმენტი, გვისმენენ თუ არა ტელეფონებზე. ახსენებ "შეშას", "პარლამენტს" და მალევე, რამდენიმე ეკიპაჟი ჩნდება. წესიერ ქვეყანაში ამის გამო შსს მინისტრი გადადგებოდა, რაც ჩვენთან სასაცილომდე წარმოუდგენელია", — წერს აქტივისტი შოთა დიღმელაშვილი ფეისბუქზე.

  • ვიდეოს სრულად ნახვა შეგიძლიათ აქ.

ფოტო: კადრები ვიდეოდან / სირცხვილია

მომხდართან დაკავშირებით კომენტარის მისაღებად On.ge შსს-ს დაუკავშირდა. პასუხს მიღებისთანავე შემოგთავაზებთ.