დაავადებათა კონტროლის ეროვნული ცენტრის ხელმძღვანელის, ამირან გამყრელიძის განცხადებით, იმისთვის, რომ შემზღუდველმა ღონისძიებებმა შედეგი გამოიღოს, რამდენიმე კვირაა საჭირო.

"ეპიდემილოგიური სიტუაციის გაუმჯობესების თვალსაზრისით ასეთი რამ არ ხდება, რომ ერთმა შეზღუდვამ მეორე დღეს უკვე შედეგი გამოიღოს. 22:00 საათის შემდეგ რესტორნების დაკეტვა გახლავთ ერთ-ერთი ბლოკი იმ მრავალსექტორულ მიდგომაში, რაც ქვეყანაში ხორციელდება — პირბადე, დისტანციური მუშაობა, ხშირი ხელების დაბანა, დისტანცია, მათ შორის, მობილობის დაგდება. ამაზე ძალიან ბევრი მტკიცებულება არსებობს, რომ შედეგს იძლევა და შედეგს დავინახავთ", — განაცხადა ამირან გამყრელიძემ.

გამყრელიძისი თქმით, არცერთი შემზღუდველი ღონისძიება მყისიერ შედეგს მეორე დღესვე არ იძლევა.

საკოორდინაციო საბჭოს გადაწყვეტილებით, 9 ნოემბრიდან დიდ ქალაქებში: თბილისში, ბათუმში, ქუთაისში, რუსთავში, ზუგდიდში, გორსა და ფოთში 22 საათიდან დილის 5 საათამდე გადაადგილება შეიზღუდა. შეზღუდვა ვრცელდება როგორც ქვეითად, ისე ტრანსპორტით და კერძო ავტომობილებით მოსიარულეებზე. ამ დადგენილების დარღვევის შემთხვევაში გათვალისწინებულია ჯარიმა 2 000 ლარის ოდენობით.

3 ნოემბრიდან 22:00 საათის შემდეგ რესტორნებს მთელი ქვეყნის მასშტაბით აეკრძალათ მუშაობა. ამის შესახებ ვიცე-პრემიერმა, მაია ცქიტიშვილმა განაცხადა.

"იმის გათვალისწინებით, რომ, ასევე, რესტორნებში გამართული ღონისძიებების დროს შეინიშნება ინფიცირების მაღალი რაოდენობა, აქედან გამომდინარე, ჩვენ მივიღეთ გადაწყვეტილება, რომ მთელი ქვეყნის მასშტაბით რესტორნებმა იმუშავონ 22:00-მდე", — განაცხადა ცქიტიშილმა.