სრული დეზინფორმაცია უწოდეს კომპანია დიღომი ვილაში თბილისი ენერჯის ბრალდებას იმის თაობაზე, რომ დიღომი ვილა გაზმა უნებართვოდ და უსაფრთხოების ნორმების სრული დარღვევით თბილისი ენერჯის კუთვნილი გაზსადენი გადაჭრა.

"მინდა მოგახსენოთ, რომ სრული დეზინფორმაციაა. დიღომი 7, 8, 9, 10-ის დასახლებაში გაზის განაწილების უფლება უზენაესი სასამართლოს განჩინებითა და სემეკის გადაწყვეტილებით აქვს ჩვენ კომპანიას. ჩვენი ქსელები უკანონოდ აქვთ მიტაცებული წლებია და დღესაც განაგრძობენ ძალადობას. ხელოვნურად ქმნიან დაძაბულ ფონს. დავა გვქონდა 6 წლის განმავლობაში, რაც დამთავრდა ჩვენი გამარჯვებით, მაგრამ სასამართლოს გადაწყვეტილებასაც არ ემორჩილებიან", — აცხადებენ კომპანიაში.

თბილისი ენერჯის გავრცელებული ინფორმაციით, უკანონო სამუშაოები კომპანიამ აბონენტების თავის ქსელზე გადართვის მიზნით ჩაატარა, რასაც დიღომი ვილა გაზში კატეგორიულად უარყოფენ და აღნიშნული დეზინფორმაციის გავრცელების გამო მოითხოვენ, თბილისი ენერჯიმ პასუხი კანონის სრული სიმკაცრით აგოს.