თბილისი ენერჯის განცხადებით, კომპანია დიღომი ვილა გაზმა უნებართვოდ და უსაფრთხოების ნორმების სრული დარღვევით თბილისი ენერჯის კუთვნილი გაზსადენი გადაჭრა. მათივე ცნობით, უკანონო სამუშაოები კომპანიამ აბონენტების თავის ქსელზე გადართვის მიზნით ჩაატარა.

"უკანონო სამუშაოების შედეგად, თბილისი ენერჯის კუთვნილი გაზმომარაგების ქსელში ჰაერი შეიპარა, რამაც თავის მხრივ ქსელის დაზიანების გარდა, აფეთქების საშიშროება შექმნა და მოსახლეობის სიცოცხლეს საფრთხე შეუქმნა", — აცხადებენ თბილისი ენერჯიში.

მათივე ინფორმაციით, მოსახლეობის უსაფრთხოების მიზნით, გაზის მიწოდება აღნიშნულ უბნებში სასწრაფო წესით 2 000-მდე აბონენტს შეუწყდა. თბილისი ენერჯიში ამბობენ, რომ ამ დროისათვის გაზმომარაგების აღსადგენად ტექნიკური სამუშაოების წარმოებაა საჭირო, რათა გაზის მიწოდება გაზის მეურნეობაში მოქმედი რეგლამენტების შესაბამისად აღდგეს.

კომპანიაში აცხადებენ, რომ ადგილზე სრულად მობილიზებულია თბილისი ენერჯის სპეციალისტები და გაზმომარაგების აღსადგენად აქტიური სამუშაოები მიმდინარეობს. თბილისი ენერჯი, ასევე, მოსახლეობას მოუწოდებს გაზის ონკანი გადაკეტონ და ბუნებრივი აირის მიწოდების აღდგენასთან დაკავშირებით თბილისი ენერჯის შეტყობინებას დაელოდონ.

კომპანია დიღომი ვილა გაზში აცხადებენ, რომ თბილისი ენერჯის ბრალდება სრული დეზინფორმაციაა. დიღომი ვილა გაზში On.ge-ს უთხრეს, რომ დიღომი 7, 8, 9, 10-ის დასახლებაში გაზის განაწილების უფლება უზენაესი სასამართლოს განჩინებითა და სემეკის გადაწყვეტილებით მათ კომპანიას აქვს.

"ჩვენი ქსელები უკანონოდ აქვთ მიტაცებული წლებია და დღესაც განაგრძობენ ძალადობას. ხელოვნურად ქმნიან დაძაბულ ფონს. დავა გვქონდა 6 წლის განმავლობაში, რაც დამთავრდა ჩვენი გამარჯვებით, მაგრამ სასამართლოს გადაწყვეტილებასაც არ ემორჩილებიან", — განაცხადეს კომპანიაში.

მათივე თქმით, აღნიშნული დეზინფორმაციის გავრცელების გამო, თბილისი ენერჯის პასუხს კანონის სრული სიმკაცრით მოთხოვენ.